Accessibility links

җомга, 9 декабрь 2016, Казан вакыты 22:14

Ufada tatar gimnaziäsen cimerügä tatarstanlılar da borçıla


Ufadağı tatar gimnaziäse tiräsendäge xällärne tatarstanlılar kübräk “Azatlıq” radiosınnan tıñlap belä. Alar anı daimi räweştä küzätep barıp aptıraşta buluların belderdelär. Rusiä Prezidentı V. Putin äledän-äle millätara tatulıq turında söyläp kilgändä, Başqortstanda şundıy xällär bulıp yatuı küplärne borçıy. Comğa könne Qazannıñ Yaña Savin rayonına başlıq itep yaña keşe bilgelände – Timur Alibaev. Milläte buyınça başqort. Moña berkemneñ dä bilgele ise kitmäde. Ä Başqortstanda küptän tügel Federal' Xökümät tarafınnan salım xezmäte citäkçese itep Tatarstannan quyılğan Aynur Äydel'dinovqa qarata qarşılıq aksiäläre uzuı şulay uq añlaşılmıy torğan xäl buldı. Dimäk, Başqortstanda millätara wäzğıät quyıra bara. Şul nisbättän comğa könne Rusiä tatarları milli mädäni moxtäriäte Şurası Rusiä Prezidentı Vladimir Putinğa, Rusiä Däwlät Duması räise Boris Grıyzlovqa, Xökümät citäkçese Mixail Fradkovqa Başqortstandağı wäzğıät buyınça çaralar kürüne sorap möräcäğät qabul ittelär. Tatarstanda da Tatar gimnaziäsen cimerü yunäleşendä barğan eşlärne iğtibarsız qaldırırğa yaramıy dip sanıy tatar cämäğätçelege. Tatarstan Däwlät Şurasınıñ mäğärif, fän, mädäniät häm milli mäs'älälär komitetı citäkçese Razil Väliev:

Ber çigenä kilep citte. Bez xoquqi ildä häm däwlättä yäşärgä tırışabız. Qanunnarğa tayanırğa tieşbez. Rusiä häm Tatarstan qanunnarı buyınça da här xalıq üz ana telendä uqırğa xoquqlı. Teläsäñ qaysı watandaş qanunnan çıqmıy ikän üz xosusıy mäktäben aça ala. Şuña tatarlarnıñ da üz mäktäplären açarğa xoquqları bar. Taläplärne qatğıyraq quyıraq kiräk. Ämma miña qalsa bu Rusiädä bara torğan tolerantlıq säyäsätenä hiç kenä dä turı kilmi. Tatarstan Däwlät Şurasına Başqortstandağı millättäşlärebezdän yış qına möräcäğätlär kilä. Alar anda milli mäğärif, mädäniätne üsterügä şartlar bulmawğa zarlana. Tatarstan Parlamentı inde Başqortstan Parlamentına möräcäğät tä cibärgän idek, ämma ni qızğanıç ul anda añlaw tapmadı.

Razil Välievkä quşılıp cämäğät eşleklese, yazuçı Fäwziä Bäyrämova:

Min monı qırğıylıq dip bäyälim. Monıñ simvolik mäğnäse dä bar, çönki mäktäp arqılı bez millät bularaq saqlanıp qalğanbız. Başqortlar isä mäktäpne beterep tatarlarnıñ ruxın sındırırğa tırışalar. Monda TR Prezidentına da quşılırğa waqıt citkänder. Prezident üz süzen äytergä tieş. Tatar kongressı da maxqämä eşen başlap cibärergä kiräk.

Fäwziä Bäyrämova fikerläre belän älege xälne küzätep baruçı “İrek mäydanı”gäcite baş möxärrire Raif Usmanov:

Monda Ufa xakimiäte barı tatar gimnaziäsen buldırırğa telämi. Şul ğına säbäp. Min irtän “Watandaş” jurnalın uqıdım anda millätara tatulıq turında matur süzlär yazılğan. Ämma alar mondıy xäldän soñ niçek duslıq turında söyli alalar ikän.

İrek mäydanı gazetası baş möxärrire Raif Usmanov fikerlären işettegez. Äytergä kiräk, Rusiäneñ ber töbägendä dä äle mondıy xälneñ küzätelgäne yuq. Başqortstanda barğan säyäsätkä küplär aptıraş belderep, andağı millättäşlärebezneñ xälen ciñeläytü öçen närsä eşlärgä dä belmi aptıraşta qaluların äytälär.

Landış Xarrasova

XS
SM
MD
LG