Accessibility links

Кайнар хәбәр

Yekaterinburda Sara Sadıyqovanıñ 100 yıllığına bağışlanğan kiçä uzdı


Yekaterinburg qalasınıñ Yuğarı İset rayonı mädäniät üzägendä kürenekle tatar kompozitorı, xalıq yaratqan iñ matur cırlarnıñ avtorı, tatar moñı alihäse Sara Sadıyqovanıñ 100 yıllığına bağışlanğan cır kiçäse bulıp uzdı. Anı Tatarstannıñ Uraldağı daimi wäkillege Tatarstan respublikası mädäniät ministrlığı, Yekaterinburg şähäreneñ Yuğarı İset rayonı xakimiäte yärdämendä oyıştırdı.

Kiçäne alıp baruçı, Tatarstannıñ atqazanğan mädäniät eşleklese Ğaliä xanım Bikbova tamaşaçılarnı Sara Sadıyqovanıñ tormış häm icat yulı buyınça mawıqtırğıç säyäxätkä çaqırdı. Mäşhür kompozitornıñ olı portretı, matur göllär belän bizälgän säxnädän xalıq küñelenä mäñgegä kerep qalğan tatar cırları yañğıradı. Tatarstannıñ atqazanğan artistı Xäydär Gıyl'fanov, Ural cırı konkursları laureatları Zölfiä Möbäräkşina, Eliza Safiullina, Eliza Maxiänova başqaruında Sara apa cırların xalıq köçle alqışlar belän qabul itte. Bigräk tä 11 yäşlek Eltza Maxianova başqaruında yañğırağan cırlar Sara apa icatınıñ mäñgelek ikänlegen tağın ber qat rasladı.

Konsertnıñ töp oyıştıruçısı, Tatarstannıñ Uraldağı daimi wäkile urınbasarı Xäydär Gıyl'fanov kiçäneñ maqsatı, ideyäse turında söyläde. “Altmışınçı, citmeşençe, siksänençe yıllarda xalıq yaratıp cırlağan cırlarnıñ barısın da barlap qarağanda, alarnıñ kübese Sara Sadıyqova bulıp çıqtı, - dide ul, - Alarnı yañartıp, zamança yañğıraş birep, xalıqqa tağın iskä töşeräse kilde. Ğomumän, köye, moñı bulğan cırlar onıtılmıy alar. Bügen xalıqnıñ bezne niçek qabul itüe, quşılıp cırlap utıruı şunıñ ber dälile buldı”.

Cırlarnıñ bayan, royal', gitara, saksofon kebek muzıka qoralları yärdämendä yañğırağan “tere” muzıka astında başqarıluları konsertqa qabatlanmas yäm, moñ östäde. Cırlar “Kügärçen” balalar ürnäk fol'klor ansamble häm “Yäşlek” biü ansamble başqaruında xoreografik küreneşlär belän bayıtıldı.

Tamaşaçılar süze buyınça, alarnıñ kübese yaratqan cırların tıñlağanda tuğan yaqlarına, yäşlekkä qaytıp kilgändäy buldı.

Ğomumän alğanda, Sara Sadıyqovanıñ 100 yıllığına bağışlanğan kiçä Yekaterinburg tatarları öçen çın mäğnäsendä yäşlek häm cır bäyrämenä äwerelde.

Fäwiä Safiullina, Yekaterinburg

XS
SM
MD
LG