Accessibility links

шимбә, 10 декабрь 2016, Казан вакыты 02:06

Hämäs belän Fatah arasında bäreleşlär


Hämäs belän Fatah arasında bäreleşlär bügen dä däwam itte. Kimendä 8 keşe yaralanğan, dip xäbär itelä. Premyer-ministr İsmail Häniä, üze Hämäs wäkile, suğışqan yaqlarnı şähär uramnarınnan kitergä çaqırdı. Ğäzza İslam universitetına 15 million dollar ziyan kilgän.

Köndäş fälestin köçläre, Hämäs belän Fatah arasında bäreleşlär tuqtatılır digän ömetlär bügen dä tormışqa aşmadı. Suğış uzğan töndä häm bügen irtän Ğäzzä sızığında ministrlıqlar, universitetlar, iminlek qorılmaları yanında däwam itte.

Comğa könne genä bäreleşlärdä 17 keşe häläk bulğannan soñ, Hämäs wäkile Nizar Rayan, ike törkem atışlarnı tuqtatu turında kileşte, digän ide:

"Fraksiälär citäkçeläre atışlarnı tuqtatu turında kileşte, anı ğämälgä aşıru adımnarı turında xäzer söyläşülär bara, kileşüne tormışqa aşıru öçen tağın ber oçraşu bulır, dip ömetlänäbez."

Fatah wäkileneñ süzläre dä ömetle ide, Äbd äl-Häkim Awad:

"Bez tınıçlıqqa qaytır öçen mömkin bulğan här tırışlıq küräbez, bügenge oçraşuı turında qısqaça şulay dip äytä alam."

Ämma oçraşu barğanda da Ğäzzä uramnarında atışlar tuqtamadı. Fälestin xakimiäte başlığı Möhmüd Abbas, ike tarafnı da fälestin xalqına ni qadär qayğı kiterüläre turında uylanırğa çaqırdı:

"Ğäzzädağı barlıq törkemnär häm fraksiälärgä fälestin xalqına şul qadär qayğı kitergän bu ğämällären tuqtatırğa sorap möräcäğät itäm. Fälestin xalqınıñ qanın tügüne tuqtatırğa çaqıram."

Fatah köçläre Awıl Xucalığı ministrlığına bärep kerep sanaqlar häm räsmi qağäzlärne urlağan, şulay uq Hämäs citäkçelegendä bulğan Elemtä häm Poçta ministrlığına raketalar atqan. Bäreleşlär Hämäs kontrolendä bulğan eçke eşlär ministrlığı häm Fatah qulında bulğan Milli İminlek xezmäte başfatirı yanında barğan. Köç qullanu şulay uq İslam häm äl-Äzhar universitetları yanında bulğan. Atışlarnı tuqtatu kileşüe turında işetkän tınıç xalıq bügen öylärennän çıqtı, ämma atışlar tuqtamadı. Ğäzza uramnarı yañadan buşap qaldı.

Alsu Qormaş
XS
SM
MD
LG