Accessibility links

җомга, 9 декабрь 2016, Казан вакыты 09:00

Ğiraq premier-ministrı Bağdad şartlawı öçen "säddamçılarnı" ğäyepli


Şimbä kön Bağdadta 130-lap keşeneñ ğömeren özgän intihar höcüm öçen Ğiraq premier-ministrı Nuri Äl-Mäliki Säddam Xösäyen tarafdarların ğäyepläde.

Başqalanıñ şiğilär yäşägän Sadriä bistäsendä bazarda bulğan bu höcüm Ğiraq suğışı başlanğannan birle iñ küp qorban kitergän höcümneñ berse buldı. Keşelär bazarda azıq-tölek alıp yörgän arada intiharçı anda maşinasın şartlatqan. Politsiä äyütençä, yök maşinasında ber tonna çaması şartlatqıç bulğan. 130lap keşe häläk bulğan, 300läbe yaralanğan. Xastaxanälär qorbannar belän tulı dielä.

"Min kibet eçendä idem, kibetemneñ tübäse başıma işelep töşkäç, añımnı yuğalttım. Şunnan soñ närsä bulğanın belmim. Närsäder şartlağanın ğına beläm. Qorbannar bik küp, bar xastaxanälär, şul isäptän, äl-Kindi, äl-Carra, äl-Näfis, qorbannar belän tulı" di başı yaralanıp, bite qanğa batqan bu keşe.

Premier Äl-Mäliki bu şartlaw artında "säddamçılar" tora dip belderde häm alarnı häm başqa sönni ğisyançılarnı cazağa tartırğa wäğdä itte. Läkin bu anıñ berençe wäğdäse tügel. Uzğan ayda ğına ul ğisyançılarnı bastırırğa wäğdä itkän ide. Ul wäğdälär ütälde dip äytep bulmıy.

Reuters agentlığı räsmi çığanaqlardan tuplağan mäğlümätlärgä qarağanda, soñğı atnada Ğiraqnıñ törle urınnarında bulğan höcüm, bäreleşlär näticäsendä meñgä yaqın keşe häläk bulğan.

Bügengä qädär iñ küp qorban kitergän intihar höcüm 2005neñ Fevralendä Hilla qalasında bulğan ide. Anda 125 keşe ülgän ide. 2006nıñ Noyäberendä Bağdadnıñ Sadr bistäsendä 6 maşina şartlatılu näticäsendä 202 keşe häläk buldı, 250se yaralanğan ide.

Kilgän xäbärlärgä qarağanda yäkşämbedä Bağdadta bulğan yaña höcümnärdä tağın distädän artıq keşe ülgän.

Ali Ğilmi
XS
SM
MD
LG