Accessibility links

якшәмбе, 11 декабрь 2016, Казан вакыты 13:04

Samar Duslıq yortında Qıtayda uqıp qaytqan tabip belän oçraşu buldı


Samar Duslıq yortında tatar cämğiäte citäkçeläre qızıqlı şäxeslär belän oçraşunı daimi oyıştırıp kilä. Bu yulı tamaşaçığa ike şäxes täqdim itelde. Berse - Rawil Zäkiev, Samarada törle çirlärdän däwalıy, siräk belgeçlärneñ berse. Rawil Zäkiev 4 yıl 6 ay Qıtayda uqıp qaytqan. Rusiädä Qıtayğa belgeçlärne cibärergä bulğaç konkurs iğlan itelä häm cide meñ yarım keşe arasınnan 38 keşene saylap alğannar, 38neñ berse genä tatar bulğan.

Rawil Zäkievnıñ tabiplıq sıyfatları äbi-babalarına barıp totaşa. Rawil äfände cide buın babaların belä, äbiläre ülännär belän däwalağannar. Ölgergän ir bulıp, 40 yäşendä Qıtayğa hönären kamilläşterergä kitä. Läkin Qıtayğa baru ike kirtädän torğan. Berençese – konkurs komissiäsen uzu bulsa, ikençese – Qıtayda uqır öçen 100 meñ dollar aqça kiräk bulğan. Ul waqıtta Rawil Zäkiev “Yaqutalmaz” kompaniäseneñ şifaxanäsendä tabip bulıp eşlägän häm şul kompaniäneñ citäkçese yahudıy Rawil äfändegä 100 meñ dollar birgän.

”Yöz meñ dollar aqça birerlek bu citäkçegä nindi yaxşılıq eşlädegez soñ?”- digängä Rawil Zäkiev bolay dide:

- Qulın kütärä almıy ide. Paraliç sıman. Ul keşe ike tapqır infarkt kiçergän. Anıñ belän bik saq bulırğa çaqırdılar. Anıñ qulı kütärelä başladı. Ülännär quyıp noqtalı massaj yasadım.

- Sez Rusiädä qaysı uqu yortın tämamladığız?

- Alabuğada uqıdım.

- Qıtayğa barğaç, iñ berençe şaqqattırğıç närsä buldı?

- Maturlıq. Öylär qatlam, qatlam. Barçası da yılmayıp eşli, yılmayıp yäşilär. Anda ruxi baylıq köçle.

- Samar uramnarında yäşlärneñ ber qulında tämäke, ikençesendä sıra. Qıtayda niçek?

- Tönlä uramnar yaqtı. Bar da yäşel çäy eçälär. İserek keşene kürmiseñ. Anda iserek keşegä bik zur ştraf.

- Qıtayğa barğaç üzegezneñ tatar keşese ikänegezne äyttegezme?

- Äyttem, bik yaxşı qabul ittelär. Ul bolay buldı. Bezne zur zalğa alıp kerdelär. 38 keşe arasında törle millät wäkilläre. Bik küplär saldılar. Ber min eçmi utırdım. Professor miña: “Nişläp eçmiseñ?”- di. “Min tatar. Biregä uqırğa kildem,”- dim. Şunda mine törkem citäkçese itep quydılar. Qurayda “Tuğan tel”ne uynadım. Qıtaylar bik yarattılar bu köyne. Här irtä 37 tabipnı quray moñı belän yoqıdan uyata idem. Dus yäşädek. Qıtaylar tatarlarnı xörmät ittelär. Min üzem tatar canlı, tatar canlı bulıp qalıyq, dinebez bar, telebez bar.

Şul uq oçraşuda Samar Däwlät meditsina universitetın tämamlağan, bügenge köndä Samarnıñ humanitar institutında psixolog bulıp eşläwçe 33 yäşlek Ramil Xayrnasov ta kilgän ide, tamaşaçılarğa üz hönäreneñ serlären söyläde, bik küp sorawlarğa töple cawap tottı.

Şamil Bahawtdin, Samar

XS
SM
MD
LG