Accessibility links

сишәмбе, 6 декабрь 2016, Казан вакыты 08:58

Semberdä “Ömet gäzitenä 17 yäş” digän çara uzdı


Anda gäzitneñ iñ aktiv xäbärçeläre, milli xäräkät äğzaları, ana tele uqıtuçıları qatnaştı. Gäzitneñ redaktorı İsxaq Xälimev başta söyläşüneñ töp yünäleşlären bilgeläp ütte. (Millät yazmışınıñ töp ideoloğı, dip äytergä dä buladır, böek şäxes Ğayaz İsxaqi mäğlümät çaralarınıñ töp maqsatı itep millätkä xezmät itüne assızıqlağan. Bez dä şul yunäleştä eşlärgä tırışabız.) Şuşı maqsattan maxsus sannar çığuına da tuqtaldı redaktor. Misalğa Semberdäge – 91-yençe, Mäläkästäge 22-nçe mäktäpkä tulayım bağışlanğan sannarın kiterde. Martta Yaña Malıklı rayonında yäşäwçe millättäşlärebezneñ milli mänfägät'lären qänäğätländerügä bağışlanğan maxsus san çığaçaq. Ä Sabantuy aldınnan – şuşı milli bäyrämebez turında. Anı tösle häm küp tirajlı itep çığaru küzdä totıla. Bötendönya Tatar Kongressınıñ alda torğan Qorıltayında başqa ölkälär wäkillärenä dä öläşü öçen. Tik moña berqädär yärdäm dä kiräk bulır. Mondıy ğämäl “Ömet”neñ abruyın kütärü, dimäk, tirajın üsterügä dä fayda kiterer, digän ömet belderde İsxaq Xälimev. Häm älege çara da şul uq maqsattan oyıştırılğan. Moña qädär gäzit üzeneñ 5, 10, 15 yıllıq yubileylarına ğına xalıq cıya ide. Ä xäzer yıl sayın bulaçaq. Tiraj mäs’äläsendä oçraşuda qatnaşuçılardan da yärdäm kötelä. Ä redaksiä üze bolay da qayber yullar ezli ikän inde. (Mäsälän, 22 häm 91 mäktäplärgä, şulay uq baytaq mäçetlärgä arzanraq bäyägä yazdıru mömkin. Bu oyışmalarğa gäzitne turıdan-turı iltep tapşıru, Poçta xezmäte öçen tüläwdän azat itep, çığımnarnı nıq kimetä.) Çığış yasawçılar da tiraj mäsäläsendä nindi çaralar kürü mömkinleklärenä tuqtaldılar. Möfti Fatıyx xäzrät Aliullov, dini mäs’älälärgä qağılışlı täqdimnärennän soñ, tiraj mäs’äläsendä üzeneñ eş ısulları belän tanıştırdı: mäsälän, mäçet qartları üz kürşeläre, tanış-beleşläre arasında ügetläw eşläre alıp baralar ikän. 55-mäktäpneñ ana tele uqıtuçısı Gölüsä Kärimeva, däreslärdä “Ömet”ne qullanıp, anıñ belän qızıqsınu uyatu, dimäk, ata-analarnı yazıluğa künderü ciñeläyä. “Aq bars” isemle yaña ğına tuğan Yäşlär oyışması citäkçese İldar Usmanov üzläre oyıştırğan çaralarnıñ “Ömet”tä kiñ yaqtırtıluı kiräklegenä basım yasadı, häm monıñ ike yaqqa da faydalı bulaçağın nigezläde. Mäläkästä yäşäwçe tanılğan şağir häm milli xäräkät aktivistı Rawil Şafiğullin üz täcribäse belän büleşte. Härkemeñ tanışları bar, alarnıñ tağın başqa tanışları. Härkem üz tanışların “Ömet”kä yazdıra barsa, sepnaya reaksiä kebek kilep çığar. Dimäk, küz qarasıday “Ömet”neñ kiläçäge – üzebezneñ qullarda. “Azatlıq” radiosı xäbärçese çığışınnan soñ, İsxaq Xälimev bu mäğlümat çarasınıñ da tirajnı üsterügä yärdäme barlığın belderde (“Bu radio ölkä tatarları tormışın yaqtırtu belän genä çiklänmiçä, “Ömet”kä qağılışlı mäsälälärne dä kütärep, anıñ tirajına da uñay tä'sir yasıy. Räxmät “Azatlıq” radiosina”, dide ul.) Çığışlardan soñ, “Tügäräk östäl” utırışı “Ömet”neñ ölkä tatarları tormışına tä'sire problemaları häm gäzitneñ kiläçäge” dip atalğan täqdimnär tuplanması qabul itte. Älbättä, töp burıç – tirajnı üsterü, monıñ öçen mäktäplärdä ana teleneñ tabiği xoquqların qaytaru çaraların kürü, gäzitne yäşlärgä tanıtu, anıñ avtorların yäşlär xisabına işäytü. Soñğısın tormışqa aşıru buyınça, Pedagogiä universitetınıñ tatar gruppalarında, Mäläkäsneñ – 22-nçe, Semberneñ 91-nçe mäktäplärendä Yäş xäbärçelär törkemnäre oyıştıru burıçı quyıldı. Moña cawaplılar bilgelände. Ä utırışqa cirle şağirebez Rifqat Xismätneñ şiğere noqta quydı. Ayrat İbrahim, Sember

XS
SM
MD
LG