Accessibility links

җомга, 9 декабрь 2016, Казан вакыты 08:54

Tatarstan möselman illär belän xezmättäşlekne üsterä


Atna azağında respublika prezidentı citäkçelegendäge räsmi delegatsiä Törkiädän qayttı. İnde xäbär itkänebezçä, alar İstanbulda uzğan Rusiä-Islam dönyası digän strategik küzallaw törkeme cıyılışında qatnaştı. Bu yulı Rusiäneñ möselman dönyası belän araların tatarstanlılar yaxşırtırğa tırıştı.

Monnan tış, Tatarstannıñ premyer-ministr urınbasarı, Mädäniät ministrı Zilä Wälieva islam tarixı, sänğäte häm mädäniäte üzäge – İRSİKA citäkçese Xalit Eren belän oçraştı. Oçraşuda süz törle xalıqlarnıñ aralaşuı häm añlaşuında mädäniätneñ zur urın biläp toruı, İRSİKA oyışmasında äğza bulıp torğan illär häm alarnıñ mädäniätläre belän tanıştıru kiräklege xaqında bardı. Zilä Wälieva häm Xalit Eren xezmättäşlek turında memorandum da imzaladılar. Anda mädäniät häm sänğät ölkäsendä aralaşuın arttıru, törle çaralar ütkärü, täcribä häm mäğlümät urtaqlaşu maqsatınnan ike yaq ütkärä torğan fänni çaralarda qatnaşu, belgeçlär belän almaşu qaralğan.

Şunısın da äytergä kiräk, Tatarstan wäkilläreneñ islam illäre belän aradaşçılıq itüe Rusiä citäkçelegenä oşağan kebek. Bilgele bulğança, Rusiä prezidentı 11-13 fevral’ könnärendä Ğäräp Ämirlekläre, Katar häm İordaniägä räsmi säfärgä cıyına. Anda Vladimir Putin belän Mintimer Şäymiev tä barır dip kötelä. Putinnıñ bu illärgä säfäre Rusiäne islam illäre belän tağı da yaqınaytaçaq häm xezmättäşlekne arttıraçaq, dip belderde jurnalistlarğa Tatarstan prezidentı İstanbulda çaqta. Şulay uq ul, Tatarstan bu maqsatlarğa ireşü öçen bar qulınnan kilgänen eşläyäçäk, dip östäde.

Gölnaz İlgizär

XS
SM
MD
LG