Accessibility links

сишәмбе, 6 декабрь 2016, Казан вакыты 11:18

Tatar diskotekasında qızlar suğışa


3-4 yıl elek Qazanda tatarça diskätüklär yuq ide. Xäzer isä atnasına 2-3 tapqır, konsert kebekläre ay sayın diärlek bulıp tora. Ğädättägeçä alarnı alarnı tatar şou säwdäseneñ akulaları Bars Media şirkäte, “Yaña ğasır” tele-radiokompaniäse, “Oscar records” prodyuserlıq üzäge oyıştıra. Süzebez ul diskätüklärne reklamalaw xaqında tügel, çönki alar bezdän başqa da yäşlärne qızıqsındıra belälär. “Bars Media” şirkäte üzeneñ tamaşasına 2 ay aldan “Tatar radiosı”, başqa rus telle radiolar, gazetalar arqılı xäbär tarata. Ütkän atna axırında “Piramida” da uzğan tatar diskotekasında qızlar suğışa. “Oscar records” oyıştırğan tatar diskotekası kiçke sigezdä başlanıp tönge 2 dä tämamlanırğa tieş bula. Biyu belän konsert çiratlaştırılıp barılğan tamaşa betügä taba barğanda 5-6 qızdan torğan törkem “Piramida”nıñ çäyxanäsendä bällür baqallarnı buşatqaç şaw-gör kilep biyu mäydançığına çığalar. Bu waqıtta tatar diskätügen oyıştıruçılar qaytıp kitkän bula, çönki säğät telläre tönge ike tula 20 minut tiräse. Tönge ikedä diskätük betä. Qızmaça, 5-6 qızdan torğan törkem sikerä-sikerä bii başlıylar. Qırıylarında ayırım ğına ike qız da küñel aça. Şuşı ike qıznıñ berse, 24 yäşlek Qazan qızı, Liliä äytüençä: - Alar bezdän 3-4 yäşkä keçeräk ide. bula. Şaw-şulı qızlar törkeme qırıyında biyuçe ikençe qıznıñ iseme Zölfiä. Näq menä tayaqnıñ awır başı Zölfiägä elägä dä inde. Qızlar suğışınnan zıyan kürgän tutaşnıñ iptäş qızı Liliä söyli: - Min atna sayın “Piramida”ğa tatar diskätügenä yörim. Soñğı tapqır barğanda iptäş qızım belän küñelsez xäl kilep çıqtı. Bezneñ qırıyda biyuçe qızlarnıñ törtkäläşäse, suğışası kilgänderme, urın citmägänderme, belmim. Minem añlawımça alar tatarça söyläşä dä almıylar ide. Biegändä dus qızıma bäylänä başladılar… Şulay itep qızlar ber-berseneñ çäçlären yolqışa başlıylar. - Izğış kilep çıqtı, alar suğışa başladılar. 6 qız iptäş qızıma qarşı. “Piramida”nıñ saq xezmäte suğış başlawçılarnı ayırdı. Bez militsiä çaqırttıq. Minem dus qızıma bäylängän qızlarnıñ berse änisenä şaltırattı, änise kilep citte. Änise kilgäç yänädän bezgä bäylänä başladılar. Qızları xätta xoquq saqçıları belän dä törtkäläşep aldı. Annarı soñ bezne maşinalarğa utırtıp Yäpeewağa alıp kittelär. Yäpeewını işetügä bu cirne belgän keşelärneñ tännäre çemerdäp quya. Qazan şähäreneñ Vaxitov rayonındağı xoquq saqçılarınıñ tärtip bozğannarnı alıp kerep niçäder säğätkä yaba torğan, cinayät eşläre quzğata torğan şomlı urın inde bu. Qazan qızı Liliä söyläwen däwam itä: - Bez militsiägä añlatma yazğan waqıtta dus qızımnıñ xäle naçaraydı. Aşığıç yärdäm maşinası çaqırttılar, şunnan bez Qazan şähäreneñ 15 xasta xanäsenä kittek. Bezneñ arttan bäylänçek qızlarnıñ änise, alarnıñ yegetläre kilep cittelär. Miña, dus qızıma yanaw süzläre äyttelär, qurqıttılar. Yazğan ğarizanı kire alırğa mäcbürlädelär. Bezne ul süzlär qurqıtmadı, ä suğış başlağan qıznıñ äniseneñ yılawı, militsiädän ğarizanı alunı ütenüe yomşarttı. İkençe könne dus qızım xoquq saqçılarınnan cinayät eşe quzğatırğa kiräk digän ğarizasın kire aldı. Diskätükneñ şundıy mixnätläre dä bula ikän anıñ. “Ğädättä tatar diskätüklärendä mondıy xälneñ bulğanı yuq ide!”- dilär konsert-iyüllärgä yış yörüçelär. Ber pıçraq sıyır böten kötüne yämsezli dip tikmägä äytmi torğandır inde xalıq. Bu könnärdä tağın diskätüklär kötelä, mondıy xällär bulmas dip berkem dä qırt kisep cawap birä almıy. İñ ayanıçı, totnaqsız qızlarnıñ ğonaxların äti-änilärenä küz yäşläre belän yua. Röstäm İsxaqi

XS
SM
MD
LG