Accessibility links

дүшәмбе, 5 декабрь 2016, Казан вакыты 11:35

Xärbilär soldatnıñ gäwdäsen vokzalda taşlap qaçqan


18 yäşlek Rail Bikmöxämmätov 2006 yılnıñ cäyendä xärbi xezmätkä çaqırıla. Saxalin utrawında yartı yıl xezmät itkännän soñ, Rail asılın ülä. Xärbi prokuratura Rail belän bergä xezmät itkän keçe serjant Çernakovqa häm yefreytor Denis Ğun'ğa qarata cinayät eşe quzğata. General-podpolkovnik Oleg Salyukov äytüençä, xärbilärneñ Bikmöxämmätovnı qinawı, ruxi yaqtan kimsetüe raslanğan. 4 dekäberdä, Railneñ ülemenä 9 kön qalğanda, Çernakov Railgä çirattağı tapqır xöcüm itep, qinap, käräzle telefonın tartıp alğan. Alay ğına tügel, yeget ülgäç, anıñ gäwdäsen mıqsıl itü däwam itä. Xärbilär Railneñ gäwdäsen Qazan vokzalında qaldırıp, qaçıp kitälär.

Tatarstan prezidentı da Rusiä armiäsendäge dedovşçina, ağayçılıq ğalämätläre belän borçuların belderde. Keşe xoquqların yaqlawçılarnıñ möräcäğätennän soñ, M.Şäymiev Rusiäneñ Saqlanu ministrı Sergey İvanovqa xat yulladı. Anda ul xärbi xezmättä üterelgän Çistay yegete Rail Bikmöxämmätov häm ülem xälendä Qazanğa qaytarılğan Radik Xäbirov oçraqların tikşerergä çaqırdı. Şuşı oçraqlarnı buldıruda häm Rail Bikmöxämmätovnıñ gäwdäsen vokzalda qaldırıp kitüdä gäyeplelärne tabıp, alarğa caza birergä kiräklegen äytte prezident İvanovqa yullağan xatında.

Düşämbe könne xärbilär Railneñ ätise Ramil Bikmöxämmätovnı tikşerü näticäläre belän tanıştırdı. Çistay yegeteneñ gäwdäsen tuğan yağına qaytaru eşe öçen cawaplı itep xärbi bülek citäkçelege Aleksey Juravlevnı bilgelägän. Ölkän leytenant Juravlev üz çiratında eşlärne yefreytorğa yöklägän. Äye, Railne daimi räweştä kimsetkän häm qinağan yefreytor Denis Ğun Çistay yegeteneñ gäwdäsen yulğa tieşleçä äzerlärgä tieş bulğan. Yefreytor isä yegetneñ yalan ayaqlarına botinkalar kidergän. Häm Rail şuşındıy qifättä äti-änise yanına qaytarılğan.

Qazanğa Railne ozata barğan ölkän leytenant Aleksey Juravlev häm moyor Viktor Buslaev yegetneñ gäwdäsen, anıñ dokumentların vokzalda taşlap qaçqannar. Häm tiz genä kire Saxalin utrawına qaytıp kitkännär. Xärbi bülek citäkçese Konstantin Bel'skiy häm tağın öç xärbi wazıyfaların naçar başqaruları xaqında kisätelgän.

Al'bina Zäynulla

XS
SM
MD
LG