Accessibility links

чәршәмбе, 7 декабрь 2016, Казан вакыты 00:51

Yewropa Berlege - Rusiä söyläşüe energiä ölkäsendäge kileşmäwçänleklärne betermäde


Yewropa Berlege räsmiläre Rusiä tışqı eşlär ministrı Sergey Lavrov belän söyläşü öçen düşämbe könne Mäskäwgä kilde. Anda töp mäsälälär energiä mäsäläläre buldı.

Yewropa Berlege räsmiläre belän Lavrovnıñ bu oçraşuı Mäskäw belän Brüsel arasında energiä säyäsätenä bäyle küptänge qarşılıqlarnıñ betüenä kitermäde.

Lavrov Mäskäw Energiä Xartiäsen xuplamıyaçaq dip belderde. Bu Xartiä Rusiäneñ neft häm gaz yatmaları, exportlawçı ütkärgeç torbaları belän eş itüçe çit il investorların arttırunı küzdä tota.

"Bez däwlättän yuğarıraq oyışma zarurlığın kürmibez" dide Lavrov.

Ul monı Yewropa Berlegeneñ 3 yuğarı wäkile belän oçraşudan soñ äytte. Mäskäwgä kilgän ul törkemdä Berlekneñ tışqı eşlär komissionerı Benita Ferrero-Waldner, Tışqı häm iminlek säyäsätläre komissionerı Javier Solana, şulay uq Berlektä xäzerge waqıtta räislek itüçe Germaniäneñ tışqı eşlär ministı Frank-Walter Steinmeier bar.

Lavrov Rusiäneñ Yewropa belän energiä xezmättäşlege şartları yül ayında Piterburda ütkän Sigezlek oçraşuında bilgelängän ide inde dide.

"Bezneñ Yewropa Berlege belän xezmättäşlek Piterburda Sigezlek sammitında energiä iminlege mäsäläläre turında ireşelgän kileşülärdäge nıqlı nigezgä tayanaçaq" dide.

Rusiä räsmiläre Mäskäw Energiä Xartiäseneñ xäzer täqdim itelgän ölgesen raslamayaçaq dip belderep kilä. Yewropa illäre isä Rusiäneñ neft häm gaz yatmaları, ütkärgeç torbaları belän eş itüdä qatnaşırğa teli. Rusiä Yewropağa mondıy mömkinlek birelgän oçraqta Brüssel dä almaşqa üz yağınnan Mäskäwgä şuña tiñ mömkinleklär birergä tieş di.

Brüssel şulay uq Yewropa Berlege belän Rusiä arasındağı yaña Partnerlıq Kileşüendä energiä ölkäsendäge ğädel säwdä qağidälären dä bilgelik di. Bu kileşü turındağı söyläşülär bıltır Polşa taläbe belän tuqtalğannan birle ul yünäleştä xäräkät küzätelmi.

Ul çaqta Warşaw Mäskäw başqa Polşadan it kertü tıyuın ğämäldän çığarırğa häm Energiä Xartiäsen ratifikatsiälärgä tieş digän taläp quyğan ide.

27 ildän torğan Yewropa Berlege Energiä çığanaqlarınıñ yaqınça çiregen Rusiädän ala.

Ukraina häm Belarus belän tüläw turında kileşä almaw säbäple Rusiädän Yewropağa gaz häm neft qudırunıñ waqıtlıça tuqtalıp toruı Mäskäw energiä ölkäsendä ışanıçlı täeminätçe bula alamı digän soraw kütärelügä säbäp buldı.

Lavrov şulay uq täeminatnıñ özelüenä kitergän tranzit illärenä qarata cäzalaw ısulları qullanu mömkinlege turında äytte.

"Bügenge söyläşülär barışında bu mäsäläne qarağanda bez şulay uq Rusiädän energiä çığanaqların Yewropağa tapşıruda problemalar çığarğan tranzit illäreneñ qayberläre Energiä Xartiäse kileşüe äğzaları buluın da bilgeläp üttek. Şuña kürä älbättä andıy tranzit illären tärtipkä öyrätü öçen kileşü äğzalarına qarata anda qaralğan ısullar qullanıla ala" dide Lavrov.

Xäzerge waqıtta Ukraina Energiä Xartiäse äğzası. Belarus bu kileşüne imzalasa da älegä ratifikatsiälämägän.

Naif Aqmal.
XS
SM
MD
LG