Accessibility links

шимбә, 10 декабрь 2016, Казан вакыты 21:42

Omskida tösle qar yawdı


Bez keçkenä çaqta tormışqa aşmaslıq berär eş turında süz barğanda, “Qızıl qar yauğaç bulır” dip äytkännäre äle dä xäterdä. Ul yıllarda qızıl qar yaumayaçağın häm äytelgännärneñ tormışqa aşmayaçağın keçkenä bala da añlağan küräsen. Ämma bügenge köndä “Qızıl qar yauğaç” dip äytkändä, saq bulırğa da kiräkter. Çönki xäzer, tabiğat torışınıñ häm ekologiäneñ üzgärü säbäple, qızıl qarnıñ yauuı da ixtimal. 31 ğinwar könne Omski ölkäseneñ 5 rayonında, Tömän, Novosibirski häm Tomski ölkäläreneñ qayber rayonnarında , cite qızıl bulmasa da, alsu häm sarı töstäge qar yaudı. Bu turıda kiñ mäğlümat çaraları da xäbär itte. Qarnıñ ni säbäptän tösle buluı turında da farızlar buldı. Xäbärlärdä tösle qardan sörsegän is kilüe, anda maylı taplar da buluı xaqında belderelde. Mäğlüm bulğança, tösle qar Omski ölkäseneñ Kolosovqa, Sidel'nikova, Tara, Tyuqala, Znamenka rayonnarındağı 49 awıl östenä yaudı. Bu xäl, älbättä, anda yäşäwçe 28000-gä yaqın keşene borçuğa salmıy qalmadı. Küp törle analizlar alındı, törle yaqtan qarnıñ sostavı tikşerelde. Düşämbe könne cirle radio-televidenie aşa xalıqqa alınğan analizlarnıñ näticäse citkerelde. Tösle qarda keşe sälämätlege öçen zararlı mätdalär tabılmawı turında belderelde, ä qarnıñ sarı töse bar tik Aral, yäki başqa ber diñgezdän dawıl belän qom kiterelgän säbäple bulırğa tieş dip iglan itelde. Bu näticäne Omski xakimiäteneñ tirä-yaq möxitne saqlaw idaraseneñ baş belgeçe Renat äfände Valitov ta rasladı. Renat äfände, başqalar kebek, qarda zararlı mätdalär bulmawı turında söyli. Şulay da ul “Gädättän tış xällär ministrlığı xezmätkärläre, şifaxanälär häm sälämätlek saqlaw punktları, kiräk bulğanda, täwlek äylänäsendä yärdäm kürsätergä äzerlär”, - di. Tösle qar Omskinıñ 5 rayonında yaudı. Ämma ber-ike könnän ul ölkäneñ başqa rayonnarda da küzätelä başlandı. Mäsälän Bol'şereç'ye rayonınıñ Ülänkül' awılına da sarı töstäge qar kilep citkän. Bu awılda yäşäwçe Räwçät äfände Zäynetdinov süzlärençä, awılğa tösle qar bu xaqta iğlan itkännän soñ ber-ike könnän soñ kilep citkän. Qarnı kürşe rayonnardan iskän cillär kitergänder,”-di ul.Sälämätlekkä zıyan bulır, dip tä borçılmıy ul. Xoday birgän gömerne yäşärbez”, di Räwçät äfände. Seber yağı şähärlärendä küzätelgän tösle qarnıñ säbäbe älegä menä şundıy ğadi añlatmalar taptı. Kiläçäktä başqaça añlatular, yäki östämä mäğlumatlar bulırmı, älegä äytüe qıyın. Härxäldä, bulğan oçraqta, tıñlawçılarğa citkererbez. Saniä Mirxaleeva, Omski

XS
SM
MD
LG