Accessibility links

шимбә, 10 декабрь 2016, Казан вакыты 04:14

Rusiä dönyada üzeneñ abruyın yaxşırtu öçen çaralar kürä


Könbatış küzätüçeläre dä Rusiädägeläre dä Rusiä belän Könbatış arasındağı mönäsäbätlär naçarayğannan naçaraya bara dip isäpli. ämma monıŋ säbäpläre turında alar törleçä fikerdä. Könbatıştağılar mönäsäbätlärneŋ naçarayuına Mäskäwneŋ BDB illärenä qarata ğına tügel, könbatış energiä şirkätlärenä qarata da agressivraq säyäsäy başlawı säbäpçe di. Rusiä yağı isä Könbatış Rusiäneŋ mänfäğätlären tanırğa telämi, salqın suğış çorındağı fikerläwdän qotıla almıy di.

Uzğan ayda Fransiädä Rusiä miliarderı Mixail Proxanov yäş qızlar säwdäse belän şöğellänüdä şiklänelep totqarlanğannan soŋ Mäskäwdä bu Könbatışta ruslarğa qarşı barğan çaralarnıŋ ber dälile dip kürsätelde.

Mäsälän, Liberal demokratik partiäneŋ räis urınbasarı Aleksey Mitrofanov Alar bezne küralmıy. Sovet çorında bez yarlı bulğan, çit ilgä kesäbezdäge 25 dollar belän çıqqanda alar bezgä KGB agentı dip şiklänep qarıy ide, xäzer dönya buylap zur aqçalar belän yörgändä alar bezdän haman da şiklänä dide.

Rusiä prezidentı Vladimir Putin da şulayraq fikerläwen belderde. Bıltır Dresdenda dönya matbuğatında Rusiäneŋ tiskäre sürätlänüe turındağı sorawğa cawap birel Putin alar bez zur häm bay bulğanğa bezne küralmıy dip cawap birde.

Uzğan ayda Mäskäwdä Italiä premyer ministrı Romano Prodi belän oçraşqanda Putin Dönyada Rusiäneŋ iqtisadıy, säyäsi häm xärbi mömkinlekläre arta barğanda ul köndäş bularaq, elegräk sızıp taşlanğan köndäş bularaq qabul itelä. Könbatış Rusiägä bilgelängän urın birergä teli, ämma Rusiä üz urının üze tabaçaq dide.

Niçek kenä bulmasın Mäskäwdä Könbatışta Rusiägä qarata tiskäre mönäsäbätneŋ artuı borçılu tudıra häm Kreml monı yaxşırtu öçen çaralar kürä başladı.

Şundıy çaralarnıŋ berse uzğan ayda Davostağı Dönya Iqtisadıy Forumına premyer ministrnıŋ berençe urınbasarı Dmitriy Medvedevnıŋ kilüe buldı. Rusiädäge küp kenä küzätüçelär fikerençä bu säfärneŋ maqsatı dönyanıŋ säyäsi elitasına Medvedevnı tanıtu bulğan. Fiker beleşülär anıŋ Rusiädä Putinnan qala ikençe urında, 16 protsent reytingı buluın kürsätä.

Däwlät qaramağındağı monopolist bularaq tanılğan Gazprom da Ukraina häm Belarus belän gaz bäxäslärennän soŋ üzeneŋ xalıqara abruyın kütärergä tırışa. Rusiä kiŋküläm mäğlümät çaraları xäbär itüençä, 16-nçı ğinwarda Gazprom citäkçelege Waşingtonda urnaşqan PBN kompaniäse citäkçelegendäge cämäğätçelek belän eşläw şirkätläre konsorsiumı belän Quşma Ştatlarda häm Yewropa Berlegendä Gazpromnıŋ abruyın yaxşırtu turında söyläşülär ütkärgän.

Jurnalist Anna Politkovskayanıŋ häm könbatışqa qaçqan elekke küzläw ofitserı Aleksandr Litvinenkonıŋ üterelüennän soŋ FSBnıŋ da abruyın yaxşırtu bik zarur. Ul da Kreml häm Gazprom kebek PR çaraları başlap cibärde. Şundıy çaralarnıŋ iŋ tanılğanı Antarktika säfäre buldı. Häm bu säfärneŋ maqsatı Könyaq Qotıpta Quşma Ştatlar monopoliäsenä yul quymaw, Rusiäneŋ däğwaların torğızu dielde.

2004 yılda FSB başlığı Nikolay Patruşev ber törkem FSB ofitserları belän Tönyaq Qotıpqa Rusiä äläme qarağan ide. 2005 yılda Patruşev FSB ofitserları belän Rusiä älämen Elbrus tawı başına qadadı.

7-nçe Ğinwarda Patruşev Antarktikadan Putinğa telefon aşa şıltıratıp Rusiädäge Barlıq pravoslav xristiannarnı raştua belän qotladı. Rusiä kiŋküläm mäğlümät çaraları monı yaqtırtuğa bik zur urın birep, xosusıy ximayäçelär yardäme belän oyıştırılğan bu säfär, Könyaq Qotıpqa Rusiä älämen qadaw Rusiäneŋ yaŋadan iŋ quätle däwlätlärneŋ berse bularaq kütärelüen kürsätä dip belderde. ämma Rusiä televideniese Patruşevnıŋ oçış öçen hawa şartları yaxşırğannı andağı Amerikan daimi üzägenä sıyınıp kötep toruı, şunnan şaltıratuı turında berni äytmäde. NTV xäbär itüençä, Putinğa şıltıratu öçen telefonnı da Patruşev amerikannardan alıp torğan.

Tağın ber PR çarası dip 13-nçe Ğinwarda FSBnıŋ Lubyankada iskeçä yaŋa yıl bäyräme oyıştırunı häm anda Mäskäwdä terkälgän çit il küzläw xezmätkärlären çaqıruın atarğa bula. Ul çarağa 55 ilneŋ, şul isäptän AQŞ, Britaniä, Izrail häm Qıtaynıŋ barlığı 118 wäkile çaqırıldı.

Babayçılıq, ğäskärdän qaçu, korrupsiä belän yamanatı kiŋ taralğan Rusiä armiäse dä üz abruyın kütärü çaralarına kereşte. 15-nçe ğinwarda Saqlanu ministrı Sergey Ivanov prezident Putin färmanı belän Salqanu Ministrlığı öçen cämäğät şurası tözelüen iğlan itte. Ul şurağa din ähelläre, pop muzıka yoldızları, häm imperiäçel monarxist fikerläwe belän tanılğan kinorejiser Nikita Mixalkov kebek başqa küp kenä kürenekle şäxeslär kertelgän.
XS
SM
MD
LG