Accessibility links

җомга, 9 декабрь 2016, Казан вакыты 22:13

Mäkkädä Hämäs häm Fatah wäkilläre oçraşa


Mäkkädä köndäş fälestin törkemnäre wäkilläre oçraşa. Söyläşüdä Fatah isemennän Fälestin xakimiäte prezidentı Mähmüd Abbas , Hämäs yağınnan anıñ başlığı Xäled Mişal, şulay uq premyer-ministr İsmail Häniä qatnaşa. Yerusalimda yähüdlär häm möselmannarnıñ izge urını, äl-Häräm äş-Şäriftä İzrail arxeologları başlağan qazınu eşläre fälestinnärneñ kisken reaksiäsenä säbäp buldı. Tawğa alıp barğan yulnı tözekländergänçe, arxeologlar cir astınnan borıñğı äyberlär ezli başladı. Söğüd Ğäräpstanğa säfärgä çığar aldınnan Fälestin premyer-ministrı İsmail Häniä, fälestinnärne, äl-Aqsa mäçete dä urnaşqan bu cirlärdä barğan qazınu eşlären tuqtatırğa çaqırdı: "Bez izge Mäkkä şähärenä yul totqanda, İzrail cihazları İske Şähärdä Arıslan Qapqası yanında diwarnı cimerergä kitte. Fälestin xalqına möräcäğät itäm, berläşep, äl-Aqsa mäçeten häm izge fälestin ciren saqlarğa çaqıram." Dini şura, qazınu eşläre ğibädätxanäneñ nigezenä ziyan kiteräçäk, dip belderde. Yerusalim möftie şäix Möhämmäd Hössäin, bu eşne – mäçetkä qarşı "agressiä" ğämäle dip atadı. İzrailneñ baş arxeologı Gidon Avni, bügen jurnalistlarğa, qurqası yuq, eşlär diwardan 50 metr yıraqlıqta alıp barıla, aña ziyan kilmiäçäk, bu ğädäti planğa kertelgän eş, dip belderde.

XS
SM
MD
LG