Accessibility links

дүшәмбе, 5 декабрь 2016, Казан вакыты 23:38

Litvinenko eşe turında Berezovski


Elekke FSB ofitserı Aleksandr Litvinenkonıñ ülemen tikşerüçe Britan politsiäse eşne prokuraturağa tapşırdı. Tikşerüçelär älegä ber belderü dä yasamadı, ämmä Britaniä mäğlümät çaraları, Scotland Yardtağı çığanaqlarına tayanıp, töp şiklänelüçe – Litvinenko belän Londonda oçraşqan Rusiä eşquarı Andrei Lugovoy dip xäbär itte. Londonda sörgendä yäşäwçe Rusiä eşquarı Boris Berezovski radiobıznıñ urıs bülegenä birgän äñgämäsendä, Litvinenko üze dä üler aldınnan miña şul isemne äytkän ide, dide.


Azatlıq: - Litvinenko bu şikläre turında sezgä berençe tapqır qayçan äytte?

Berezovski: - Saşa ağulanğannan soñ anıñ yanına xastaxanägä kilgäç (ul çaqta äle Scaremello versiäse tikşerelä ide) ul miña, Boris beläseñme, min Lugovoy, Kovtun häm tağın ber keşe belän oçraştım, minemçä mine alar ağuladı" dide. Mine bu ğäcäpländerde, çönki ber kön elek kenä Lugovoy minem ofisqa kilgän ide, bez ikebezgä ber şeşä aq şäräp eçtek. Saşanıñ şikläre minem öçen kötelmägän buldı. Işanammı-yuqmı, digändä, soñğı yıllardağı awır täcribämnän çığıp, özderep, yuq dip äytä almıym. Çönki, teläsä, Lugovoy, bu ğäyepläwlärne bik ciñel kire qağa alır ide, oçqıçqa utırıp monda kiler ide dä, Scotland Yardqa barıp barısın da söylär ide.

Azatlıq: - Litvinenko sezgä üz şiklären berär niçek añlattımı?

Berezovski: - Äye añlattı. Ul, küräseñ, iminlek xezmätkärläre "elekke" bulmıy, dide. Anıñ fikerençä, Lugovoy färman ğına ütägän. Başta aña yaqınayırğa kiräk bulğan, annarı – üterergä. Putin, iminlek xezmätlärenä çit ildä, mäxkämäsez, köndäşlärne yuq itergä röxsät itkän färman imzalağannan soñ, Saşa miña, bu yuq iteläselär isemlegendä bez berençe – min, Zakaev, sin dip berniçä tapqır äytkäne buldı.

Azatlıq: - Sez Lugovoy belän şäräp eçtem didegez, dimäk anıñ sezne dä ağulaw mömkinlege bulğan, ni öçen ul monı eşlämägän?

Berezovski: - Min farazlıy ğına alam, bu sorawnı başqalarğa birergä kiräk. Ni öçen Saşanı, küräseñ säbäpläre bulğan. Saşa miña närsä belän şöğellängänen söyläde, ul cinäyätçel biznesta qatnaşuçılar turında citdi dälillär tuplağan ide. Alar çınlap ta citdi ide, çönki ul bik yaxşı tikşerüçe ide.

Azatlıq: - Rusiä prokuraturası wäkilläre Londonğa barıp, qayber keşelärdän soraw alu niäten belderä.

Berezovski: - Ägär bu tikşerügä yärdäm itä ikän, min Rusiäneñ baş prokuraturası wäkile belän oçraşırğa äzer. Bu oçraqta Rusiä Scotland Yardnı şantaj itä. Sez bezgä sorarğa röxsät birsägez, bez - sezgä birerbez, di. Min, räxim itsennär, ägär bu dustımnıñ üterüçelären tabırğa yärdäm itä ikän, sorasınnar didem. Bez Saşanıñ xatını belän ber fikerdä, bu eşne yomırğa yul quymayaçaqbız, cinäyätçelärne tabu öçen axırına qädär baraçaqbız.

Ali Ğilmi
XS
SM
MD
LG