Accessibility links

җомга, 9 декабрь 2016, Казан вакыты 18:39

Samarda Salawat ike zur konsert birde


İke zur zalğa biletlar ber atna eçendä satılıp bette. Şunısı iğtibarğa layın, Salawat konsertları turında xätta reklama da yasap tormadılar. Xalıq ber- bersenä äytep, yögerep kilep biletlarnı alıp beterdelär. Salawatnıñ elekkege konsertlarında bildän tübän şayarularğa urın muldan birelä ide. Bu yulı cırçı nindiräk programma kürsätü turında üz fikerläre belän “Aq bäxet” isemle radiotapşırular alıp baruçı Nailä xanım Sabircanova urtaqlaşa:

Salawatnıñ bu konsertın min xätta spektakl' dip äyter idem, häm beraz köç quyıp tırışqan xäldä çın tatar muzıykal' spektakl' bieklegenä kütärep bula, häm, hiçşiksez, berär dramaturg belän elemtägä kerep bu äsärne yazarğa kiräk. Bu p'yesada töp geroylar – Şüräle, Salawat häm oluğ kompozitorlar cırları.

Konsert- tamaşa Salawatnıñ professor isemenä layıq. äxlaqi yaqtan da, muzıykal' yaqtan da. Soqlanğıç cırlar,iskitmäle dekoratsiä. Bayançılarnıñ milli kiemnän buluları küñelgä yomşaqlıq östi. Salawatnıñ kiemnäre dä zäwıq belän milli ruxta. “Afärin, Salawat!”- dip äytäse kilä.

Nailä xanım, här konsertta kul'minatsion mizgel bula. Salawat konsertında bu tawçıq qay cirendä küzätelde dip sanıysız?

Älbättä bu yuğarı noqta – ul Salawatnıñ “Qazanımda kilä yäşisem” cırı. Bu cır ruxi märkäzebezgä gimn bieklegendäge tatar yörägennän sarqıp çıqqan mädxiä. Çittä yäşäwçe tatarlarnıñ kübese Qazannı kürmi yäşilär. bu cır yañğırağanda minem küzläremnän yäş aqtı.

Nailä xanım, küzdän yäş ağunıñ säbäbe bula bit?

Säbäbe bik ğadi. Cırı bik tirän eçtäleqle, Qazanda yäşise kilep kitte. Salawat cır başqarğanda zur ekranda Qazannıñ iñ matur cirläre kürsätelde. Min üzem Salawatqa tügel, ä küzläremne ekrannan almadım.

Dimäk, bügenge tamaşaçığa tä'sir köçen arttırır öçen äle texnik çaralar da kiräk bulıp çığamı?

Ul här cırğa da kiräkmi inde älbättä. Ä menä “Qazan…” cırına bik kiräk.

Nailä xanım, ä menä tulayım bäyälägändä professor cırçı Salawatnıñ öç säğätlek programmasına nindi bilge quyar idegez?

Salawatnıñ här programması yañalıq, läkin dä monısı barçasınnan da ayırılıp tora. Üzeneñ tatar qaharmanlığı belän öç säğät buyına qazanğa, Tatarstanğa, tatar xalqına, tatar äxlağına mädxiä cırlana.

Konsert- tamaşa axırında Salawat:”Bez üzebezne üzebez genä saqlap qala alabız”,- dide. Zalda utıruçı tamaşaçığa bu öygä eş bulıp yañğıradı, ä ürnäkne Salawat kürsätte. Tatar bulıp qalasıbız kilsä, bez tatar tösmerläre kergän kiem kiärgä, tatar cırın tıñlap, tatarça söyläşep, tirä- yünebezdä tatar moxite tudırıp, dinebez islamnı Konstitutsiäbez itep qabul itep üz qabığıbızğa biklänep yäşi belergä tieşbez. Şul waqıtta globalizatsiä iblise tatar öçen qurqınıç bulmayaçaq.

Şamil Bahautdin, Samar

XS
SM
MD
LG