Accessibility links

җомга, 9 декабрь 2016, Казан вакыты 04:55

Keräşen tatarları “Tuum” bäyräm itte


7 fevral'dä Säydaşev muzeyında keräşen tatarlarınıñ qışqı yolalarına bağışlanğan kiçä ütte. Bu kiçä xristiannarnıñ dini bäyrämnäre -(Rojdestvenskie svyatki) yäğni, Tuum bäyrämnären ütkärügä bağışlanğan.

Säydäş muzeyında Keräşen tatarlarınıñ muzıkal' kiçäläre 3 yıl buyı ütkärelä. Bu çärşämbedä ütkän kiçä “Tatar muzıka kul'turasında etnik traditsiälär”gä bağışlanğan ide. Döresräge – keräşen tatarları ğöref-ğadätläreneñ muzıkada çağılışı.

Ğalimcan İbrahimov isemendäge tel ädäbiät häm sänğät institutı ğalime, fol'klorçı Gennadiy Makarov bu kiçäneñ maqsatı häm üzençälege turında bolay dide.

“Keräşen tatarlarınıñ qış köne bilgeläp ütä torğan bäyrämnäreneñ berse Narduğan bäyräme alarnıñ dinne qabul itkänçe bäyräm itel torğan bäyräm bulğan. Din qabul itelgäç, bu bäyrämneñ östenä xristian dine yolaları kerep utıra. Häm ul Tuum bäyräme itep ütkärelä başlıy. Häm Tuum bäyrämendä İisus Xristosnıñ tuğan könenä bağışlanğan törle yolalar başqarıla.

Bezneñ maqsatıbız bügenge köndä bezneñ nindi ruxi, sänğät mirasıbız barlıqqa kilgän, şularnı saqlap qalu. Bu kiçäneñ üzençälege şunda ki, berençe tapqır bularaq çirkäw cırları sänğät äsäre bulıp yañğırıy.”

Gennadi Makarov citäklägän fol'klor törkemenä yörgän balalar bu kiçädä çirkäwdä başqarıla torğan (doğa) yäki iman başqardılar.

Bu törkemgä yörü närsä birä digän sorawğa balalarnıñ äniläre bolay dip cawap birde.

“Balalar çirkäwdä keläwdä bulalar. Bu bik zur tärbiä , televizor qarawdan tıyılıp toralar, ber berse belän aralaşalar.”

Qazandağı keräşen çirkäweneñ Pavel ätise bu kiçägä tamaşaçı bularaq kilgän. Muzeyda ütkärelgän kiçä turında ul bolay dide.

“ Bez kul'tura buyınça artta qalasıbız kilmi. Din tärtiben bez üzebez başqarabız, ä kul'tura buyınça nindi bäyrämnärebez bar, bez anda qatnaşabız. Duxovnıy cırularnı başqarırğa monda kildek”

Menä şulay, Qazanda yäşäwçe keräşennär üzläreneñ yola, dini bäyrämnärendä cırlana torğan cırların onıtmıylar, cırlar aşa üzläreneñ balaların şul din qağidäläre belän tärbiäli.

Mälikä Basıyr

XS
SM
MD
LG