Accessibility links

дүшәмбе, 5 декабрь 2016, Казан вакыты 23:49

Pekiñda Pxenyannıñ atom programması turında 6 yaqlı söyläşülär yañartıldı


Pekiñda Tönyaq Koreanıñ atom programması turında 6 yaqlı söyläşülär başlandı. Anda Tönyaq Korea üzeneñ atom programmasınnan baş tartqan oçraqta aña iqtisad häm iminlek ölkäsendä qızıqsındıruçı täqdimnär yasaw turındağı 2005-nçe yılğı belderüne tormışqa aşıru mäsäläse qarala. Räsmilär bu söyläşülär uzğan üktäber ayında Pxenyannıñ berençe atom sınawınnan soñ tağın da naçarayğa körçektän çığarğa yardäm itär digän tıynaq qına optimizm belderde.

Tönyaq häm Konyar Korealar, AQŞ, Yaponiä, Rusiä häm Qıtay wäkilläre bügen tağın Pekiñda yabıq işeklär artında söyläşügä cıyıldı.

Mondıy 6 yaqlı söyläşülär 2003 yıldan birle ütkärelep kilä. Ämma älegä ul söyläşülärneñ cämäğätçelekkä mäğlüm berdän-ber näticäse 2005 yılnıñ sintäberendäge urtaq belderü genä buldı. Ul belderüdä Tönyaq Korea üzeneñ atom programmasınnan baş tartqan oçraqta, aña yardäm bireläçäge häm Quşma Ştatlarnıñ Stalin däwlätçelegen xäterlätkän bu ilne üzgärtmäskä wäğdä itüe turında äytelä.

Söyläşülärdä AQŞ yağınnan qatnaşuçı Christopher Hill bügen başlanğan oçraşuğa tıynaq qına bulsa da optimizm belän qarawın belderde.

"Bez ğämällärgä kereşkändä, ägär dä bez kereşsäk bu 2005-neñ sintäberendäge kileşüne tormışqa aşıru yünäleşendä bik zur, uñay adım bulaçaq. Häm bu bez kileşüne tulısınça tormışqa aşırmıyça uñışqa ireşü bulmıyaçağın añlaw belän bulaçaq" dide Hill.

Könyaq Korea wäkile Chun Yuñ-wu isä kiskenräk itep bu söyläşülärdä tärräqiät bulmawına zarlandı. Ul xäbärçelärgä Tönyaq Koreanıñ atom programmasın beterü eşe süzgä süz däräcäsendä genä bara. Bezgä ğämälgä-ğämäl däräcäsenä kütärelergä waqıt citte inde dip belderde.

Tönyaq Korea wäkile Kim Kye Gwan Pekiñğa kilü belän ük Pxenyan atom qoralınnan arınuğa taba berençe däräcä adımnar turında söyläşergä äzer dide.

Kim tağın Tönyaq Koreanıñ adımnarı Waşingtonnıñ doşmanlıq säyäsätennän baş tartıp uzara tatu yäşäwgä küçenä bäyle bulaçaq dip östäde.

Şulay da anıñ bu süzläre 6 yaqlı söyläşülärneñ dikäber ayındağı oçraşuında äytkännärennän üzgäreş buluın kürsätä. Ul çaqta Kim qoralsızlanu turında ğömünän süz alıp barudan baş tartıp Tönyaq Koreanıñ xisapları bulğan Qıtay bankına qarata AQŞnıñ finans çikläwlären ğämäldän alunı taläp itkän ide.

Elegräk Pxenyan Quşma Ştatlarnıñ säyäsäte Bush idaräseneñ Tönyaq Koreadağı kommunistik xakimiätne bärep töşerü niäten kürsätä dip 2 märtäbä söyläşülärdä qatnaşudan baş tarttı.

Pänceşämbe könne AQŞ wäkile Hill qabat kiçekterülär bulmasqa tieş dide.

"Älbättä bu bik möhim oçraşu. Çönki bu söyläşülärdä qantaşuçılar monıñ mäñge däwam itä almawın añlıy. Minemçä, däwam itsä bu sez xäbärçelärne dä beraz alcıtır ide. Bez çınnan da zur maqsatqa ireşergä tırışabız. Bez Tönyaq Koreanıñ atom qoralınnan arınuına ireşergä telibez" dide Hill.

Uzğan atnada Pxenyanda bulğan AQŞ belgeçläre Tönyaq Korea energiä yardämenä häm AQŞ belän yaxşı mönäsäbätlärgä almaşqa üzeneñ töp atom reaktorın tuqtatıp torunı häm xalıqara tikşerülärne yañartunı täqdim itärgä mömkin dip belderde.

Naif Aqmal.
XS
SM
MD
LG