Accessibility links

шимбә, 3 декабрь 2016, Казан вакыты 18:50

"Yewropanıñ soñğı diktatorı" – Lukaşenkanıñ yalğız tormışı


Moñarçı gel Rusiägä qarap torğan Belarus prezidentı Aleksandr Lukaşenkanıñ Mäskäw belän araları suınğannan soñ, xäzer ul nişlär, "Yewropanıñ soñğı diktatorı" dip yörtelgän citäkçe yözen Yewropağa taba borırğa mäcbür bulmasmı?

"Dönyanıñ 20 iñ yaman diktatorı" isemle kitap yazğan amerikan jurnalistı David Wallachinsky şuşı kitabında Lukaşenkağa iñ küp urın birgän. Anı diktator bularaq qına tügel, şäxes bularaq öyrängän. 1998 yılda Japoniädä Olimpiä uyınnarı waqıtında anıñ käşäkä suqqannarın küzätkän, Belraus jurnalistlarınnan soraqşan, Lukaşenkanıñ härçaq yalğız yörüennän, xatınınıñ berqaya da kürenmäwennän çığıp, anıñ turında üz qaraşın buldırğan:

"Mindä, ul üzeneñ ütkänennän oyala, zamança kürenergä teli, ämmä xatını belän kürsälär, qayan çıqqanın belerlär dip qurqa, digän xis qaldı" di David Wallachinsky.

Yazuçı fikerençä, xäzer Lukaşenkanıñ xäle möşkel. Moña qädär ul gel Mäskäwgä qarap yäşäsä, soñğı neft häm gaz bäxäse arqasında Mäskäw belän aralar sundı, ä Yewropa anı diktator dip sanıy.

"Lukaşenka awır xäldä, çönki Yewropa anıñ keşe xoquqların bozuına küz yomırğa, Yewropa üzägendä andıy baş bäläse telämi, alar qaraşınça, diktator zamanası inde ütte" di David Wallachinsky.

Nindi xäldä qalğanın Lukaşenka üze dä añlıy kebek. Sişämbedä ul, siräk küreneş, Könbatış agentlığına zur äñgämä birep, Yewropa belän elemtä qoru ixtimalın da telgä aldı:

"Rusiä belän krizis näticäsendä Yewropa Belarusqa iğtibar itte, häm ansız energiä iminlegen täemin itep bulmağanın añladı. Belarusnıñ möstäqil, bäysez bulırğa teläwe alar öçen yañalıq buldı" di Aleksandr Lukaşenka.

Mäskäw belän araları bozılğan, Yewropa da anı qabul itmäsä, yazuçı Wallachinsky fikerençä, Lukaşenkanıñ ber genä yulı qala – başqa diktatorlarğa iärergä:

"Yewropa belän dä, Rusiä belän dä problemnar bar ikän, ul başqa diktatorlar kebek – Qıtay, İran, Paqstan, Afrika illärenä borılaçaq" di David Wallachinsky.

2006 yıl saylawları waqıtında oppozitsiä köçläre meñlägän keşe qatnaşında demontartsiälär ütkärep, Lukaşenka utırğan qänäfine beraz qaqşattı kebek, läkin soñraq bu xäräkät sürelde, xäzer Lukaşenka urınında yänä nıqlı utıra:

"Aldağı 4 yılda xalqıma wäğdä itkänemne ütärgä nasıyp itsen, döresen äytkändä, ägär monı eşläsäm, häm dä sälämätlegem bulsa, min säyäsi köräştän kitergä cıyınmıym" di Aleksandr Lukaşenka.

Belarus prezidentınıñ bu belderüe, älbättä, berkemne dä şaq qatırmadı.

Ali Ğilmi
XS
SM
MD
LG