Accessibility links

сишәмбе, 6 декабрь 2016, Казан вакыты 17:18

Tatar gimnaziäse binasın cimerü tämamlandı


Ufada tatar gimnaziäse öçen dip tözelüçe binanı cimerü eşläre 9 fevral' könne töş waqıtında tämamlandı. Öç qatlı mähabät binadan kirpeç, timer-beton xäräbäläre genä torıp qaldı. Ul tözeleş watıqların da mäxkämä pristavları zur yök maşinaları belän biredän alıp kitü xästärlegen kürä.



Şulay itep Ufada tatar eşquarları tatar gimnaziäse öçen dip tözetüçe bina tiräsendä 1 fevral'dä başlanğan kierenkelek üzeneñ iñ yuğarı noqtasınnan tübän tägäri başlar kebek. Ämma monıñ alay bulmayaçağı xaqında da belderä Başqortstannıñ Berläşkän oppozitsiäse wäkilläre. Alar comğa könne töştän soñ jurnalistlar öçen matbuğat oçraşuı oyıştırdı häm aldağı könnärgä uy-niätläre belän urtaqlaştı. Oçraşuda biredä açlıq iğlan itkän keşelärneñ Belderüe dä qabul itelde. Anda respublika xakimiätläre fatıyxası belän şuşı binanı cimerüneñ bar tatar xalqına qarşı eşlängän xösetlek buluı assızıqlana. Jurnalistlar belän oçraşunı Başqortstannıñ Berläşkän oppozitsiäse başlığı, Başqortstan Tatar milli-mädäni moxtariäte räise, tatar gimnaziäse binasın tözetügä töp öleşen kertkän Ramil Bignov açtı häm alıp bardı.

Tatar gimnaziäse öçen dip tapşırılğan binanı cimerüneñ nigezendä barı tik säyäsi häm milli säbäplär genä yatuın qat-qat äytte Ramil Bignov. “Bezneñ şuşı binanı sütkän ber waqıtta şuşınnan yöz metr arada ğına restoran häm kunakxanä tözeleşe bara, - dide ul. – Läkin ul tözeleşkä bäylänüçe yuq, çönki anıñ xucası - Başqortstan parlamentınıñ ber deputatı”.

Ramil Bignov şuşı köç qullanıp cimertelgän binanıñ zıyanın kire qaytaru çaraların küräçäkme soñ, çönki anıñ bäyäse 20 million sum belän isäplänä. “Azatlıq” xäbärçeseneñ şuşı sorawına Ramil äfände bolay cawap birde.

“Äye, bez bu mäs'älädä Ufanıñ Oktäberskiy rayonı mäxkämäsenä möräcäğät ittek. Mäxkämä aşa üz xoquqlarıbıznı yaqlayaçaqbız”.

Başqortstannıñ Berläşkän oppozitsiäse başlığı, Başqortstan Tatar milli-mädäni üzäge räise Ramil Bignov fikerläre buldı.

Matbuğat oçraşuında açlıq iğlan itüçelärdän Başqortstan Tatar ictimaği üzäge räise Ayrat Ğiniätullin belän Oktäberskiy şähärennän kilgän tatar şağire Ğali Ğizzät tä qatnaştı. Ayrat Ğiniätullin üz çığışında respublika tatar xalqınıñ xoquqları bozıluğa iğtibar cälep itü öçen xalıqara däräcägä çığu kiräklegen äytte. Şulay uq Başqortstan tatarlarınıñ xäle turında mäğlümatlar tuplağan kitaplar çığaru, bäysez gazetalarnı, ayırım alğanda “Xalıq ixtıärı” basmasın kiñräk faydalanu kiräklegen dä äytte ul.

- Bez Başqortstan tatarları xäle turında mäğlümatlar tupladıq. Xäzer anı broşyura itep çığarırğa cıyınabız. Bu mäğlümatlarnı dönya cämäğätçelegenä citkerergä kiräk.

Älege matbuğat oçraşuı barğan säğättä Başqortstannıñ “Başinform” räsmi mäğlümat agentlığınıñ elektron säxifäsendä respublika Mäxkämä pristavları baş idäräseneñ ber Belderüe dä bäyän itelde. Baş mäxkämä pristavı Zarif Bayguskarov imzalağan ul Belderüdä äle cimertelgän bina tiräsendäge xällärgä bäyle añlatmalar birelä. Anda mäxkämä pristavlarınıñ ğämälläre qanun nigezendä häm mäxkämä qararına nigezlänep başqarıluı xaqında äytelä. Ä mäxkämä pristavlarınıñ bu binanı yaqlap qarşılıq çaralarında qatnaşuçılarğa qarata köç qullanuı xaqındağı xäbärlärneñ yalğan buluı turında äytelä.

Läkin moña qarata Başqortstan Tatar milli-mädäni moxtariäte räise urınbasarı, professor Mäcit Xucin üz fikeren citkerde. “Mäxkämä pristavları üzläreneñ başbaştaqlığın yäşerä almıy, çönki bez alarnıñ här adımın videokamerağa töşerdek häm ul tasmalarnı bez teläsä nindi auditoriädä kürsätep alarnı faş itä alabız” – dip belderde Mäcit Xucin.

XS
SM
MD
LG