Accessibility links

Кайнар хәбәр

Yekaterinburda tatar-başqort ictimaği oyışması xisap cıyılışı uzdırdı


Yekaterinburg şähärendä urnaşqan Tınıçlıq häm Duslıq yortında Mäcit Ğafuri isemendäge tatar-başqort ictimaği oyışması äğzalarınıñ çirattağı cıyılışı bulıp uzdı. Cıyılışta qatnaşuçılar arasında tatar häm başqort aktivistlarınnan tış, Yekaterinburg şähär duması deputatı Oleg Xäbibullin, Sverdlovski ölkä Yazuçılar berlege räise Yuri Kazarin häm Rossiä Yazuçılar berlege räistäşe Valentın Luq'yänin bar ide.

Mäcit Ğafuri isemendäge oyışma citäkçese Söfxät ağa Nadıyrov cıyıluçılar aldında uzğan eşlär turındağı xisap belän çığış yasadı. Cıyılışta kön tärtibendä qaralğan mäs'älälär arasında Musa Cälilneñ 100 yıllığına bağışlanğan çaralarğa yomğaq yasaldı, milli eşlär buyınça könüzäk problemalar barlandı.

15 fevral' köne Sverdlovski ölkäsendä uzğan yıl iğlan itelgän Cälil yılın tögälli.

2006 nçı yıl buyına tatar xalqınıñ batır ulına bağışlanıp uzdırılğan çaralar bixisap. Şul uq waqıtta uzğan yıl eş yünäleşenä kertelgän qayber çaralarnı ğämälgä aşıru bu yılğa qaldı.

Andıylarnıñ berse itep Musa Cälilneñ saylanma äsärlärennän tözelgän öç tomlıqnı atarğa bula. Tatar, rus, ingliz tellärendä öç teldä çığarılaçaq saylanma şiğerlär öç kitap bulıp bastırılıp, suvenir tartmada berläşterelep dönya küräçäk. Sverdlovski ölkä Yazuçılar berlege räise Yuri Kazarin äytüençä, bu eşkä aqça tabılğan, basmalarnı tuplap, kirägen tärcemä itü buyınça zur eş başlanğan. Yuri Viktoroviç şulay uq Musa Cälil isemendäge ädäbi premiä buldıru turındağı täqdimneñ bügenge köndä yaqlaw tapmawı turında da äytep ütte. Yazuçılar berlege räise, bu yılda uzdırılaçaq çaralarğa tuqtalıp, tatarlar tuplanıp yäşägän Krasnoufim töbägendä şiğer marafonı uzdırırğa cıyınuları turında belderde.

Tatar ictimaği oyışmaları wäkilläre, bik açınıp, Yekaterinburg şähäre uramnarınıñ bersenä Musa Cälil isemen birü turında küp yıllar artınnan yörep tä, axır çiktä bu isemne şähär çitendä urnaşqan Sadovıy bistäseneñ taşlandıq uramnarınıñ bersenä birelügä qaytıp qaluı turında söylädelär. Şulay uq qaharman şağirgä häykäl tözü öçen maxsus fond buldıru turında da süz alıp barıldı.

Tatar ictimaği xäräkäte veteranı Rinat äfände Wälullin fikerençä, milli ğorurlıq bulıp sanalğan isemnärne mäñgeläşterü, milli mirasnı saqlaw eşlärenä yäşlärne cälep itärgä kiräk. Alğa barğan eşlär çamalı, yäşlärne cälep itep bulsa, bu yaña köç zur eşlär başqarırğa yärdäm itär ide, dide ul.

Uzğan yıl Sverdlovski ölkäsendä Mäcit Ğafuri isemendäge tatar-başqort ictimaği oyışması citäkçese Söfxät Nadıyrov başlanğıçı belän Musa Cälilneñ 100 yıllığına bağışlanğan istälek medale buldırılğan ide. Bu medal'gä milli eşlärdä başlap yörüçe tınğısız yöräkle aktivistlar, qäläm ostaları, Musa Cälilneñ yubiley çaraların oyıştıruda üzlärennän zur öleş kertüçelär layıq buldılar. Söfxät ağa äytüençä, älege medal' üz iälären Tatarstan cirendä dä, Orenburda da, Mäskäwdä dä tapqan.

Cıyılışta Musa Cälilneñ 100 yıllığına bağışlanğan istälek medale Sverdlovski ölkäse Yazuçılar berlege räise Yuri Viktoroviç Kazarinğa, Rossiä Yazuçılar berlege räistäşe Valentin Petroviç Luk'yaninğa, tatar häm başqort milli oyışmalarına törle çaralar uzdıruda häm mäçetlärgä daimi räweştä yärdäm kürsätep toruçı Yekaterinburg şähär Duması deputatı Oleg Bähali ulı Xäbibullinğa tapşırıldı.

Valentin Luq'yänin cawap çığışında Cälil icatı anıñ öçen härwaqıt tormış ürnäge bulıp toruın äytte häm şundıy ul tudırğan tatar xalqına olı xörmäten belderde. 1955 nçe yılda, Ural yaqlarına küçep kilü belän ük, iñ köçle tä'sirläremneñ berse biredä eşçän, ğädel, buldıqlı tatar xalqınıñ biredä küp buluı dide ul. Yarım şayarıp, ul Sverdlovski yağın tatar xalqı başqalası bulırğa layıqlı yaq dide. Tatarlar biredä töp xalıq, bu cirneñ xucaları bulırğa xaqlı xalıq, dide Valentin Petroviç.

Cıyılışta tatar ictimaği oyışmaların berläşterü Forumın uzdıru buyınça fiker alışular bulıp uzdı.

Qatnaşuçılar fikerençä, Sverdlovski ölkäsendä Bötentatar Forumın uzdıru bik kiräk. Moña qädär qaysı eşläp, qaysı käğäzdä qalıp kilgän utızlap tatar milli oyışmasın berläştererlek, alarnıñ eşenä yünäleş birerlek üzäk tözep bulsa, millät aldında torğan könüzäk mäs’älälärne çişü küpkä ciñeläyer ide. Mäcit Ğafuri isemendäge tatar-başqort ictimaği oyışması wäkilläre ölkädäge tatar deputatlarına häm millät yazmışına bitaraf bulmağan keşelärgä şundıy täqdim belän çığarğa qarar ittelär.

Fäwiä Safiullina, Yekaterinburg

XS
SM
MD
LG