Accessibility links

пәнҗешәмбе, 8 декабрь 2016, Казан вакыты 19:19

Xäyriäçelektä dini oyışmalarnıñ yärdäme nidän ğibärät?


Bügenge cämğiättä baylar häm moxtaclar bar häm alar arasındağı küperne barı din wäkilläre genä sala ala dielde kiñäşmädä. Bilgele bügen xäyriä yunäleşendä eşläwçe törle oyışmalar barlıqqa kilä. Alar könläp tügel säğätläp arta bara. Xäzer xäyriä belän şöğellänüçe fondlarnıñ sanı 4 meñgä citä ikän. Läkin alarnıñ küpçelege berençe çiratta üzlären kürsätü belän şöğellänä, ä çınlıqta yärdäm qılmıy dielde. Ä menä dini oyışmalar isä qaywaqıt üzläre dä sizmästän küp izgeleklär başqaruı äytelde. Sädaqa, zäkyät birüçelärneñ dä küpçelege üzlären kürsätergä yaramıy. Häm küp oçraqta aqça birüçelär çerep bayığannar tügel, ä urta xällelär buluı assızıqlandı. Tatarstan säwdä-sänäğät pulatı citäkçese Şamil Ageev:

Xäyriä eşen küpläp başqaru zarur, ämma anı kürsätü kiräkmi.

Şamil Ageev äytüençä xäyriä belän şöğellänüçelärne salımnardan azat itü kiräk bulır ide. Ämma bu äle xäl itelmägän.

Utırışta äytelgänçä, bügen keşelärgä aqçalata yärdämgä qarağanda ruxi cılılık kübräk kiräk. Din wäkilläre isä berençe çiratta şul yunäleştä eşlärgä tırışalar. Bu xaqta Tatarstan möselmannarı Diniä Näzaräte räise urınbasarı Wäliulla xäzrät Yaqub:

Material' yaqtan yärdäm itüçelär citärlek, ämma äle ruxi yaqtan bulışu kiräk. Şul nisbättän inde TR Sotsial' yaqlaw ministrlığı belän öçyaqlı kileşü dä tözelde.

Wäliulla Yaqub äytüençä, xäyriälek ul berençe çiratta dinneñ näticäse. Tatarstan Prezidentınıñ sotsial' mäs'älälär buyınça Däwlät kiñäşçese Tata'yana Larionova da din oyışmaları bügen zur wazıyfa başqara dip assızıqladı. Tat'yana Larionova:

Bügen äle xalıq yärdäm itä almağan yunäleştä dä dini oyışmalar zur bulışlıq kürsätüe mömkin. Bu inde eşlängän mexanizm.

Tat'yana Larionova dini oyışmalar xätta bomjlar- suqbaylarğa, narkomannarğa da yärdäm itä ala dip assızıqladı. Bilgele ki, aqçağa kilgändä, dini oyışmalarnıñ ul yunäleştä üzlärenä dä bügen yärdäm kiräk. “Möxämmädiä” mädräsäsendä belem aluçı 73 yäşlek Saniä Miäsarova “Möxämmädiä” mädräsäsenä yärdäm kiräklegen äytte. Utırışta Xäyriä yılı uzıp kitär, ämma dini oyışmalarnıñ ruxi yärdäme härwaqıt qalaçaq dielde.

Landış Xarrasova

XS
SM
MD
LG