Accessibility links

чәршәмбе, 7 декабрь 2016, Казан вакыты 13:37

Gurbanğuli Birdemöxämmädov - Törkmänstannıñ yaña prezidentı


Törkmänstannıñ elekke sälamätlek saqlaw ministrı Gurbanğuli Birdemöxämmädov aldan kötelgänçä çärşämbe könne ilneñ prezidentı dip iğlan itelde. 49 yäşlek Birdemöxämmädov sovet çorınnan soñğı Törkmänstannıñ ikençe prezidentı. Räsmi sannarğa qarağanda yäkşämbe könne 6 namzät qatnaşında ütkän saylawlarda ul tawışlarnıñ 90-lap protsentın cıyğan.

Törkmänstannıñ yaña prezidentı kem bulaçağı äle räsman bilgele bulmasa da çärşämbe irtäsenä Aşxabadta Halk Mäsläxäte dip atalğan iñ yuğarı qanun çığaru cıyını utırışı bilgelängän ide. Şul inauguratsiä çarasında qatnaşu öçen çit illärdän 20dän artıq yuğarı qunaq ta kilde.

Nihayät Inauguratsiä könendä irtän genä Üzäk Saylaw Komissiäse räise Murat Qarrıyev televidenie aşa Birdemöxämmädovnıñ ciñüen iğlan itte.

"Törkmänstan prezidentlığına namzät Birdemöxämmädov Gurbanğuli tawışlarnıñ 89.23 protsentın cıydı" dide Qarrıyev.

Ciñüçeneñ kem bulaçağın härkem aldan belä ide.

Şul iğlannan soñ uq Xalq Mäsläxäte utırışında inawguratsiä tantanası başlanıp kitte. Xalıq Mäsläxäteneñ 2 yarım meñläp äğzası, şulay uq Rusiä, Äfğänstan, Gruziä, Qazaxstan, Taciqstan, Törkiä häm Ukraina xökümät başlıqları aldında Birdemöxämmädov tantanalı räweştä prezident antı birde.

"Törkmän xalqı häm böten dönya prezidentlıqqa nazmätlär arasında köräşneñ açıq häm ışanıçlı räweştä ütkänlegen kürde" dide yaña prezident.

Birdemöxämmädov dikäber ayında kötelmägändä wafat itkän Saparmurat Niyazovnıñ, Törkmänbaşınıñ urının aldı.

Birdemöxämmädov ilne Niyazov yulınnan alıp barırğa wäğdä birde. Ul şulay uq energiä çığanaqlarına bay Törkmänstanda eşçänlek alıp barırğa teläwçe illärne elekke kileşülärgä xörmät bulaçaq dip ışandırdı.

Saylaw aldı köräşe barışında Birdemöxämmädov tağın mäğärif sistemasın Niyazov qısqartularına qädär bulğan xälenä qaytarırğa wäğdä ittä. Niyazov mäktäptä mäcbüri uqu yılların, universitet studentların kimetkän, Törkmänstan watandaşlarına çit ildä uqu mömkinlege qaldırmağan ide.

Birdemöxämmädov şulay uq Niyazov tarafınnan bik nıq kimetelgän sälamätlek saqlaw sistemasın torğızırğa wäğdä birde.

Ber yıl elek Niyazov yöz meñläp keşene pensiä alu xoquqınnan mäxrüm itkän ide. Birdemöxämmädov pensiä mäsäläsen dä yañadan qarıyaçağın äytte.

Ul şulay uq dönyanıñ iñ yabıq cämğiätlärennän berse bulğan bu ildä moñarçı küz aldına da kiterep bulmağan närsäne Internetqa totaşunı ciñeläytüne wäğdä itte.

Analitiklar Birdemöxämmädov reformalarnı artıq tiz ütkärä häm yıraq kitä almıyaçaq dip kisätä. Şulay da Niyazov xalıqtan tartıp alğan qayber töp şartlarnı kire qaytaruı belän yaña citäkçe ildä abruyın arttıra ala dilär.

Naif Aqmal.
XS
SM
MD
LG