Accessibility links

якшәмбе, 11 декабрь 2016, Казан вакыты 05:23

Qazanda peşekçelär häm tabınçılar bäygese uzdı


Qazanğa soñğı yıllarda qunaqlar küp kilä häm ser tügel berençe çiratta märkäzebezdä alar tatar milli aşlarnıñ oşawın äytälär. Äytergä kiräk, tatar milli aşlarınıñ retseptların tuplawda Yunıs Äxmätcanov küp köç quyğan. Bügenge Bauman uramındağı Tatar aşları yortın da näq ul oyıştırıp cibärgän. Läkin qızğanıçqa qarşı bügenge köndä tatar aşların äle barmaq belän genä sanarlıq – toqmaçlı aş, öçpoçmaq, çäk-çäk, talqış qaläwäsе. Ä Yunıs Äxmätcanov cıyğan baylıqlar arasında şaqtıy ğına retseptlar bulğan. Häm xäzer näq şularnı qaytaru häm xalıqqa tanıtu burıçı tora. Bu xaqta Qazannıñ Qullanuçılar bazarı häm xezmät kürsätü komitetı citäkçese urınbasarı Rämziä Xaciewa:

Turizm üseş alğanda bezneñ alda zur maqsat tora. Peşekçelärne retseptlarğa öyrätep, tabınçılar belän eşläw bezneñ töp maqsatıbız.

Rämziä Xaciewa äytüençä, tatar milli aşların tanıtuda, yaña mäğlümatlar birüdä veterannar zur eş başqara ikän. Läkin yäşlär küräseñ kübräk Yevropa aşlarına tartıla. Qızğanıçqa qarşı pänceşämbe könne “Riv'yera”da bäygedä qatnaşqan peşekçelärneñ berse dä tatar aşı täqdim itmäde. Kübese yapon-qıtay, yäğni suşi, şaşlıqlar peşerde, törle balıq rizıqları äzerläde. Äytergä kiräk, şulay uq bäygegä härber qatnaşuçı närsädä dä bulsa peşerep kilergä tieş ide. Häm menä ul rizıqlar arasında çäk-çäk, talqış qaläwäse, qamır rizıqları bar ide. Ämma yäşlär anı üzläre peşermäwen äyttelär. Dimäk, zaman belän bergä rizıqlarğa da moda üzgärä. Yapon kuxnyası tatarnıqın basıp kitä. Läkin bügen barlıq restoran-kafelarda da tatar aşların aşap bula dilär. Bu xaqta Yaña Savin rayonı qullanuçılar bazarı häm xezmät kürsätü bülege citäkçese Danil Zıyätdinov:

Saf tatar aşxanäläre bulmasa da här tuqlanu urınında tatar milli rizıqları bar.

Bäygedä isä şulay uq tabınçılar da qatnaştı. Alarnıñ küpçelege östäl bizäw ostalıqların, xezmät kürsätü ürnäklären täqdim ittelär. Äytergä kiräk, bügen äle Qazan tabınçılarına üsäse dä üsäse. Çönki ozaq xezmät kürsätü, qaşıq-çäneçkelärne alıp kilmi toru misalları şaqtıy. Häm bu xaqta qızğanıçqa bäygedä süz bulmadı.

Landış Xarrasova

XS
SM
MD
LG