Accessibility links

шимбә, 3 декабрь 2016, Казан вакыты 14:51

Semberdäge tatar mäktäbe aldında qıyınlıqlar da bar


“Ömet” gäziteneñ soñğı sanı, tulayım diärlek, Mäläkästäge tatar mäktäbenä bağışlanğan. Uquçılarnıñ fikere ber: “Beznekedäy nurlı mäktäp yuq!”

Ä menä yaña ğına täpiläp kitkän Sember mäktäbe ni xällärdä ikän? Anıñ direktorı Älfiä Abutdinova äytüençä, yarıysı ğına. Üze dä tirän zäwıq belän cihazlanğan kabinetlı buluına şatlığın belderde. Ber kürenekle millättäşebez tanış maltabarların cıyıp, oluğ büläklär belän kilgän. Balalar häm alarnıñ äti-äniläre öçen konsert programması da kitergän. Uqıtuçılarnıñ härbersenä, yaxşı uquçılarğa büläklär öläşkän. Aşxanädä barçasında çäy, täm-tomnar belän sıylağan. Häm iñ ğibrätlese – isemen dä ällä ni kiñ yañğıratmasqa quşqan. Şundıy tıynaq häm izge keşe inde bu mäşhür keşebez.

Üzläre büläklär kitergännär – bezgä räxmät uqıylar, dide Älfiä xanım, aptırap häm şatlanıp.

Ä annan başqa soñğı arada yärdäm itüçelär kürenmi. Mäktäpne açqanda remont eşlärenä zur yärdäm ittelär, xäzer ällä arıdılarmı, ällä aqçaları betteme, ällä ber genä märtäbä yärdäm qaralğanmı alar tarafınnan – äytüe qıyın.

Daimi yärdäm bulsın öçen İğänäçelär şurası buldıru kiräkter bit, digän täqdim Älfiä xanım öçen yañalıq tügel – şuña dokumentlar äzerläw belän mäşğul' ikän. Anıñ citäkçese bulırday äti keşelärebez dä bar. İlgizär Zıyätdlinov, mäsälän. Ägär ul riza bulmasa, bik tä itäğät'le, paq qullı, milli canlı Kamil Musin bar. Döres, anıñ balaları mäktäp yäşendä tügel inde – üskännär, läkin ul onıqların biredä uqıtırğa cıyına.

Läkin problemalar da yuq tügel. Haman da sänğät citäkçese tabılmıy. Älfiä xanım bu cähättän Avtonomiä citäkçelegenä ömetlänä. Läkin… Anıñ ber utırışında barlıq sälätle millättäşlärebezne barlap, mäğlümat tuplaw täqdime yañğırağan ide. “Barlıybız, barlıybız, menä professorlarıbız isemlegen tözibez”, digän cawap qına buldı. Monısı isä – ölkädä yäşägän häm yäşäwçe kürenekle tatarlarnı tuplağan ensiklopediä öçen genä. Läkin alar belän qızıqsınırday kiläçäk buın da kiräkter bit äle…

Mäktäpneñ tuuına ğorurlandıq, maqtandıq qına tügel -maqtaldıq ta. Tik menä bu mäktäpneñ daimi qayğırtuğa moxtac, anı näni baladay qarap tärbiäläp üsterü kiräklege turında da uylarğa kiräkter bit. Mäläkäs avtonomiäse eşçänlege ürnägendä, mäsälän. Tik andıy mönäsäbät ölkä üzägendä älegä sizelmi, kürenmi…

Ä mäktäp aldına başqa problemalar da kilep basqalıy.

Kom'yutorlarğa litsenziäle programmalar quyu taläp itelä. Monıñ öçen 30 meñnän artıq aqça kiräk, di. Zur mäktäplärgä bu ällä ni qıyın tügel. Äytik, bıyılğı cılı qış kommunal' xezmätkä tüläw çığımnarın kimette. Şunnan qalğan aqça belän qaplap bula. Ä kvartirant xälendäge 91-mäktäp öçen andıy çığımnar qaralmağan. Direktor Älfiä xanım Abutdinova üz eşmäkärlärebezgä ömetlänä. Bulmasa, yänä dä şul uq Qazanğa möräcäğät itärgä turı kiler. Bik tä uñaysız bulsa da, dide Älfiä xanım.

91-mäktäp direktorı Älfiä Abutdinova belän

Ayrat İbrahim ,Sember

XS
SM
MD
LG