Accessibility links

сишәмбе, 6 декабрь 2016, Казан вакыты 22:59

Ural Räximov östendä bolıtlar quyıra


Başqortstannıñ neft' eşkärtü häm yağulıq energetikası tarmağı östendä tağın da qara bolıtlar quyıra başladı kebek. Prezident Mortaza Räximovnıñ ulı Ural Räximov qaramağında bulğan Yağulıq energetika kompleksına qarata çirattağı däğwälar iğlan itelgän. Rusiäneñ Yuğarı Arbitraj mäxkämäse Ural Räximov qulındağı şirkätlär däwlätkä 42 milliard sum külämendä burıçlı dip belderde. Bu Ural Räximovnıñ üz baylığınıñ yartısı çaması digän süz. Äle yañaraq Rusiä milliarderları isemlegendä Ural Räximovnıñ 30 nçı urınnı biläwe häm anıñ baylığı 89 milliard sum külämendä buluı xaqında bäyän itelgän ide.

Arbitraj mäxkämäse däğwäları östenä, soñğı könnärdä Başqortstannıñ neft' eşkärtüçe şirkätläre tiräsendä yaña imeş-mimeşlär dä tarala başladı. Qayber küzätüçelär farazlawınça, Başqortstan neft' eşkärtü tarmağı şirkätläre aksiälären Rusiäneñ kiñ bilgele ber monopolistı – “Gazprom” şirkäte üz qulına töşerergä cıyına ikän. Xäyer, bu inde farazlar däräcäsendä genä dä tügel, çönki mondıy ixtimallıqnı “Gazprom” citäkçeläre üzläre dä kire qaqmıy ğına tügel, ä bu yünäleştä küptän inde söyläşülär başlanuı xaqında da äytä ide.

Başqortstan citäkçeläre häm respublika neft' şirkätlären üz qulında totuçı Ural Räximovnıñ bu adımğa barırğa telämäwe xaqında da mäğlüm ide. Anıñ ätise Mortaza Räximov ta yañaraq Ufada Ekologiä mäsälälärenä bağışlap uzdırılğan bötenrusiä kiñäşmäsendä Başqortstannıñ töp baylığın birüçe neft' eşkärtü şirkätläreneñ berkemgä dä birelmäyäçäge xaqında äytkän ide. Monı qayber küzätüçelär ğap-ğadi satulaşu dip kenä atadı. Äye, Başqortstan yağulıq tarmağı şirkätläre “Gazprom” tarafınnan yotılsa, moñarçı Başqortstan neftennän fayda kürüçe respublika aksionerları küp närsä yuğaltaçaq. Ä aqça yuğaltu xakimiätne dä qaqşatu digän süz.

Elektän dä mäğlüm buluınça, Başqortstan neft' eşkärtü tarmağı şirkätlären üz qullarına töşerergä etläwçelär baytaq. “İkençe ber monopolist – “Rosneft'”neñ dä Başqortstan neft' zavodların üz qaramağına küçerergä cıyınuı mäğlüm ide. Niçek kenä bulsa da, Başqortstan neft' eşkärtü şirkätläre yazmışı tizdän xäl iteläçäk, dip kötelä. Bu xaqta respublikadağı kiñ bilgele iqtisatçı, professor Rinat Ğataullin da belderä. Anıñ süzlärençä, äle Başqortstannıñ şuşı tämle bäleşen Mäskäwdä büleşü bara. “Moña inde Başqortstan xakimiätläre berniçek tä qarşı tora almayaçaq”, - di ul.

XS
SM
MD
LG