Accessibility links

җомга, 2 декабрь 2016, Казан вакыты 22:52

Ädäbiät häm mädäniät yılına näticälär


16 fevral' könne G.Qamal teatrı binasında premyer-ministrı Röstäm Miñlexanov qatnaşında mädäniät ministrlığınıñ kiñäytelgän utırışı ütte. Kollegiä belän premyer-ministr urınbasarı, mädäniät ministrı Zilä Välieva räislegendä uzdı. Yıllıq utırış härwaqıttağıça xisap çığışlardan başlanıp kitte. Tatarstanda uzğan ädäbiät häm sänğät yılına näticälär häm 2007 yılğa eş plannarı belän premyer-ministr urınbasarı, mädäniät ministrı Zilä Välieva tanıştırdı. Ul respublikada häm çit cirlärdä mädäni çaralarnıñ nindi däräcädä uzuın assızıqladı, bäyälär birde. Qayberlärenä ayırım tuqtaldı. Tulı näticä yasağanda Zilä Välieva tübändägelärne äytte:

“Ädäbiät häm sänğät yılı bezneñ öçen üzençälekle buldı. Ul bezneñ xalqıbıznıñ berläşüen, Tatarstan sänğäteneñ kürenekle wäkilläreneñ ireşkän uñışların propagandalauga, respublikabıznıñ qup millätle mädäniäten açıqlawğa häm Tatarstan sänğäteneñ rusiä häm dön'yaküläm sänğät moxitendä urın aluına zur öleş kertte. Häm Rusiäneñ ädäbiät häm sänğät ölkäsendä iñ yuğarı bilgesen Yosıf turında qissa baletın quyuçı Tatar akademiä opera häm balet teatrı kollektivı layıq buldı.

Sankt-Peterburgta böyek tatar şağire Ğabdulla Tuqayğa häykäl açıldı. Ğabdulla Tuqaynıñ yaña muzeyı Qazaqstannıñ Ural'sk şähärendä açıldı.”

Ädäbiät häm sänğät yılnıñ näticäläre kürsätkänçä, bu ölkädä bik küp eşlär başqarılğan. Şunı da äytergä kiräk, älege yılnıñ çaralarında 1 million keşe qatnaşqan, yäğni respublikada yäşäwçe här öçençe keşe mädäniät ölkäsenä üzennän öleş kertkän.

2007 yılğa burıç itep isä ministrlıq, mädäniät uçaqların, kitapxanälärne barlaw maqsatın quydı. Monnan qala bıyıl Qazanda Surikov isemendäge institutnıñ filialı açıluı planlaştırıla.

Mädäniät häm sänğät yılında bu ölkägä qarağan xezmätkärlär cawaplı häm bik küp eşlär başqardılar, ämma bu ölkädä xezmät quyuçılarnıñ eş xaqı başqalar belän çağıştırğanda iñ tübäne ikän. 2007 yılda isä alarnıñ xezmät xaqı ber yarım tapqır artaçaq dip belderde tatarstan premyer-ministrı urınbasarı - mädäniät ministrı Zilä Välieva. Respublika Däwlät Şurasızınıñ fän, mäğärif , mädäniät häm milli mäs'älär komitetı räise Razil Väliev isä üzeneñ çığışında mädäniätçelärneñ tübän xezmät xaqı iñ zur problema dip belderde.

Qazan däwlät sänğät universitetın tämamlap, mädäniät ölkäsenä eşkä kilgän yuğarı belemle xezmätkärneñ xezmät xaqı 1300 sum, muzeylarda, mädäniät yortlarında, kitapxanälärdä eşläwçelär isä qullarına 3-4 meñ aqça ala.

Bu Rusiä külämendäge mäs'älä, häm här töbäk anı üzençä xäl itärgä tırışa. Tatarstanda da bu ölkädä şaqtıy eşlär başqarıla. Törle östämä tüläwlär ğämälgä kerä başladı. Ämma mömkin bulğannarın da faydalanmawçılar yuk dide Razil Wäli.

Monnan ike yıl elek tellär turında zakon qabul itelde. Häm anda ike däwlät telen belep eştä qullanğan öçen 15 protsent östämä tüläw turında stat'ya bar. Ämma ul şuşı köngä qadär eşlämi. Çönki anı qabul itü öçen xökümätebez nigezlämä qabul itmägän. Ägär dä tieşle çaralar kürelsä, tatar teleneñ dä berniqädär däräcäse üsär ide. ”

Respublika rayonnarınnan kilgän mädäniät idäräläre citäkçeläre üz çığışlarında cirle üzidarä şartlarında eşläwçe mädäniät uçrejdenieläreneñ xälen kütärde. Här awılnıñ üz kitapxanäse, klubı eşlärgä häm anda respublikanıñ sänğät kollektivları kilep yörergä tieş, digän fikerlär äytelde. Şulay uq utırışta yıldağıça respublikada mädäniätneñ häm bigräk tä anıñ ähelläreneñ sotsial' xäle turında süz kütärelde. Şunlıqtan premyer-ministr Röstäm Miñlexanov mädäniät yortlarına, sänğät kollektivlarına bazar şartlarında yäşärgä öyränergä kiräklegen assızıqladı:

“Xalıqnıñ yäşäw däräcäse yaxşıra, küp kenä tüläwle xezmätlär barlıqqa kilä. Şähärlärdä küñel açu üzäkläre, kinoteatrlar açıla, monıñ östenä eş barğanı kürenep tora.bezgä dä tik torırğa yaramıy. Ni öçen bez bu ölkägä eşmäkärlekne cälep itmäskä tieşbez?”

Tatarstan Premyer ministrı Röstäm Miñlexanov yıllıq utırışqa näticä yasap, mädäniät ölkäsenä kiläçäktä dä yärdäm kürsäteläçägenä işarä itte.

Gölnaz Şäyxetdin

XS
SM
MD
LG