Accessibility links

Кайнар хәбәр

Ramzan Qadırov Çeçnä prezidentı buldı. Älegä waqıtlıça


Atnakiç könne Rusiä prezidentı Vladimir Putin xakimiättä berniçä üzgäreş başqardı. Şul isäptän, Çeçnä prezidentı Alu Alxanov Yustitsiä ministrı urınbasarı itep Mäskäwgä küçerelde. Anıñ wazıyfası waqıtlıça premier-ministr Ramzan Qadırovqa yöklände. Qadırov axır çiktä Çeçnäneñ prezidentı bulaçaqmı?

Küp kenä küzätüçelär monıñ şulay bulaçağında şiklänmi. 2004 yılnıñ Mayında Çeçnäneñ ul çaqtağı prezidentı Äxmät Qadırov üterelegännän soñ bu urınğa saylanğan Alu Alxanovnı küplär uq çaqta uq waqıtlı citäkçe dip atağan ide. Alxanov soñğı waqıtta yoğıntısın beraz arttırsa da, respublika belän çınbarlıqta Ramzan Qadırov idarä itte. Ätise ülgännän soñ Rusiä prezidentı Putinnıñ Ramzanğa beldergän ixtiramın iskä alıp, küplär aña Çeçnä prezidentı bulırğa yäşe genä qomaçawlıy digän näticä yasadı. Konstitutsiä nigezendä prezident kimendä 30 yäştä bulırğa tieş. Ramzanğa 30 yäş uzğan yılnıñ üktäberendä genä tuldı.

Alxanovnıñ bu urınnan kitüe, ber yaqtan, anıñ belän Ramzan Qadırov arasında ike yıl däwam itkän qarşılıqnıñ betüen añlata. Üzläre kire qaqsalar da, andıy qarşılıq bar ide, häm soñğı waqıtta ul köçäyä genä bardı. Eş ike citäkçeneñ saqlaw xezmätläre arasında çualışlarğa qädär barıp citte.

Üz qaramağında meñlägän qorallı keşe totqan, qatı qul belän idarä itüçe, Ramzan Qadırovnıñ keşe xoquqların sanğa suqmawın tanısalarar da, küplär soñğı waqıtta anıñ Groznıyda başqarğan tözekländerü eşlären uñay yaqtan iskä ala.

Kremlneñ soñğı adımına xättä İçkeriä xökümäteneñ sörgendäge wäkile Äxmät Zakaev xuplaw belderde.

"Putin bu adımın añlı räweştä yasağanmı, mäcbüriät nigezendägeme - bu respublikada käyeflärneñ içkeriä tarafdarları yağına awışuın kürsätä" dide Äxmät Zakaev.

Comğa könne Razman Qadırov Çeçnäne Rusiäneñ iñ bay töbägenä äyländeräçägen belderde.

Şul uq waqıtta qayber küzätüçelär Qadırovnıñ xolqın iskä alıp, respublikanı tulısınça ber keşe qaramağına qaldırunı xatalı adım dip sanıy.

Rusiä prezidentınıñ Könyaq bülgedäge wäkile Dmitri Kozak comğa könne Groznıyda kiñäşmälär ütkärde. Bu kiñäşmälär nigezendä ul prezident Putinğa kimendä ike namzät täqdim itergä teiş bulaçaq. Putin şularnıñ bersen saylap alıp Çeçnä parlamentına raslawğa täqdim iter dip kötelä.

Uzğan atna axırında Münxenda ütkän iminlek konferensiäsendä prezident Putin Çeçnädä problemnar çişelde, wazğiät normalläşte dip beldergän ide. Ber yaqtan qarağanda, şuşı mantiqtan çığıp fiker yärtsäñ, xäzer anda köçle citäkçe kiräk tügel dip tä uylarğa bulır ide. Läkin Rusiä prezidentı nindi matiqtan çığıp qarar qılır, äyüte qıyın.

Ali Ğilmi
XS
SM
MD
LG