Accessibility links

дүшәмбе, 5 декабрь 2016, Казан вакыты 05:39

2003 yıl İstanbul höcümnäre öçen ğömerlek törmä cäzası birelde


Törkiädä soñğı 7 yılda iñ şaw-şulı mäxkämä eşe tämamlandı. Törek mäxkämäse 2003 yılda İstanbulda intihar höcümnär oyıştıruda ğäyeplängän barlığı 48 keşegä xökem çığardı. Äl-Qaidä äğzaları dip şiklänelgän 7 keşe ğömerlekkä irektän mäxrüm itelde, qalğan 41-nä 18 yılğa qädär törmä cazası birelde.

2003 yılda İstanbulda ike sinagoga, Britan konslulatı, London bankı bülege binalarında bulğan şartlawlar näticäsendä barlığı 60qa yaqın keşe häläk buldı, yözlägäne cäräxätlär aldı.

Töp oyıştıruçı sanalğan, çığışı belän Süriäle Loal Möxämmät Xac Bäker Äl-Saqa ğömerlek törmägä xökem itelde. Utırış barışında ul iptäşläre belän şayarıp utırdı, üzenä belderelgän ğäyepläwlärne kire qaqtı.

Äl-Qaidäneñ Ğiraqtağı elekke citäkçese Äbü Musab Äl-Zarqawinıñ iptäşe sanalğan, bomba yasaw ostası Äl-Saqa 2005 yılda Antalyada, yalğışlıq belän üz öyendä şartlatqıç şartlatqannan soñ, qulğa alınğan ide. Törek räsmiläre äytüençä, ul Urta diñgezdä İzrail köymäsen şartlatırğa cıyınğan bulğan.

Äl-Saqadan tış tağın 6 keşe ğömerlek törmä cazasın aldı: Harun İlhan, Fäwzi Yetez, Yosof Polat, Baqi Yeget, Osman Eken häm Adnan Ersöz. Törek mäxkämäse alarnı küp ülemnärgä kitergän şartlawlar oyıştıruda, köç belän xakimiät üzgärtü tırışlığında ğäyepläde. Harun İlhan digäne bomba quyğanın häm Äl-Qaidä äğzası buluın tanıdı.

Törkiäneñ Konya qalasında Äl-Qaidä bülekçäsen citäkläwdä ğäyeplängän Säyet Ertul 18 yıl, bomba yasaw, yalğan dokumentlar äzerläwdä ğäyeplängän Xämit Obısi 12 yıl törmä cäzasın aldı.

Alarğa yärdäm itüdä ğäyeplängän tağın 39 keşe 3tän alıp 6 yılğa qädär xökem itelde. Şiklänelgännär arasında bulğan 26 keşe aqlandı.

Ğäyeplänüçelärneñ advokatı Mehmet Sami Selçuk şikäyät biräçägen belderde:

“Barlığı 72 keşe şiklänelgän ide, şularnıñ 48e cäza aldı. Bu bez kötkän xökem tügel, bez şikäyät biräçäkbez” dide Selçuk.

Britaniä tışqı eşlär ministrı Margaret Beckett Törkiä mäxkämäse çığarğan xökemgä xuplaw belderde.

Ali Ğilmi
XS
SM
MD
LG