Accessibility links

пәнҗешәмбе, 8 декабрь 2016, Казан вакыты 13:00

Aziädä Altın Duñğız yılı başlandı


18 Fivral ay kalendare nigezendä yaña yıl başlandı. Aziä illärendä millionlağan keşe et yılı tämamlanıp duñğız yılı başlanuın bäyräm itä. Pekin uramnarında bügen iñ yış yañğırağan süz: Gung Hey Fakh Choi -Qıtayça - Yaña yıl belän!

“Bu yaz bäyäme bezneñ öçen bik möhim, başqalar öçen Raştua kebek. Şaw şulı mäşäqät, utlar yandıru, şayarular härkemne bäxetle itä” di Pekinda yäşäwçe Li Yaguang isemle xanım.

Ğöref-ğädätlärgä kürä qıñğıraw çıñlawı, ut atular usal ruxnı quıp yaxşı kiläçäk çaqırunı añlatqan. Bu ömetlär bıyıl bigräk tä zur, çönki duñğız yılı Aziädä uñış yılı dip sanala. Citmäsä, Qıtay yoldızlığına kürä bıyıl altın duñğız yılı ikän, anısı 60 yılğa ber turı kilä.

“Bu duñğız yılı miña baylıq, şatlıqlar alıp kiler, äti-änilärem isän-saw, bar dulsarım tınıçlıqta, bäxetle bulır, dip ömetlänäm” di Deng Yu isemle Pekin keşese.

Altın duñğız yılı Aziä illärendä xalıq sanı artuğa da öleş kerter, dip kötelä. Çönki bu yılda tuğan balalar bäxetle bula digän, ışanu bar. Soñğı tapqır mondıy yıl İkençe dönya suğışı axırına, Aziädä xastaxanälär, tabiplarğa qıtlıq çorına turı kilgän ide. Xäzer isä yaña tuğan balalar sanı kisäk artır, Aziä qitğasında xalıq sanına tağın berniçä million östäler dip kötelä.

Bäyräm çaraları uzğan töndä ük başlandı. Şul isäptän Taiwanda da. Taiwan prezidentı Chen Shui-bian üz xalqına eçenä aqça tamğası salınğan 150 meñ konvert tarattı. Hong bao dip atalğan bu konvertnı alır öçen prezidentıñ öyenä utrawnıñ törle poçmaqlarınnan xalıq ağıldı. Eçendä çın aqça bulmasa da, ul bäxet kiterä dip sanala.

Ali Ğilmi
XS
SM
MD
LG