Bäxet ber yılmaysa yılmaya inde ul. Rusiä tarafınnan Qazanğa iğtibar haman arta bara. Däwlät şurasınnan qalışmaq maqsatınnanmı, Rusiä Prezidentı Xakimiäte citäkçese Sergey Sobyänin da küçmä kiñäşmäne Qazan Kremlendä uzdırdı.
Anda Rusiä Prezidentı Xakimiäte citäkçese urınbasarı Vladislav Surkov, Tatarstan prezidentı Mintimer Şäymiev häm Rusiä prezidentınıñ törle töbäktäge wäkilläre qatnaştı. Rusiä prezidentınıñ wäkilläre digäç, bälki kemnärder, bu oçraşuğa prezidentnıñ Yıraq könçığıştağı wäkile, yaqtaşıbız Qamıl İsxaqovnı da kötkänder. Ämma ul tağın ber qat, tuğan yaqqa qaytıp kilüne kiräk dip tapmağan küräsen. Cıyılışta Tatarstanda ilküläm proyektların tormışqa aşırılu qaraldı. Awıl xucalığı tarmağında şaqtıy zur täcribäse buluı säbäple, xakimiät tarafınnan, kiñäşmäne uzdırılu öçen iñ uñaylı urın dip Qazan şähäre tabılğan.
Dörestän dä Tatarstanda awıl xucalığı belän maqtanırlıq. “Qazan” xalıqara at-sport kompleksında urnaşqan TR agrosänägat' qazanışları kürgäzmäsendä yörgändä, Qunaqlarğa Tatarstannıñ agrosänägat' ölkäsendäge uñışları turında respublika Premyer-миниcтры urınbasarı – awıl xucalığı häm azıq-tölek ministrı Marat Äxmätov söyläde. Ul xäbär itkänçä, respublikada awıl xucalığı mäydannarı 4 million gektarnı täşkil itä, alarnıñ 3,5 millionı sörü cirläre. Yıl sayın Respublikada 5 million tonnağa yaqın aşlıq, 2 million tonna şikär çögendere, şul uq külämdä bäräñge häm yäşelçä üsterelä, 1,6 million tonnadan artıq söt citeşterelä. Ministr süzlärençä, berniçä yıl elek respublika citäkçelege tarafınnan tarmaqqa ere cirle investorlarnı cälep itü qararı qabul itelgän häm bügen alarnıñ cirläre 2 million gektarğa citkän. Alar yärdämendä artta qalğan citeşterü fondların yañartırğa, awıllarda aldınğı texnologiälär üzläşterergä, awıl xalqınıñ tormış däräcäsen yaxşırtırğa mömkin bulğan.
"Uzğan yıl, awırlıqlar tuuğa da qaramastan, östenlekle ilküläm proyektlarnı ğämälgä aşıru öçen uñışlı yıl buldı dip äytep bula. Rusiäneñ küp töbäkläre awırlıqlarğa bireşmiçä, älege proyektlarnı başqarıp çığuğa ireşte. Biredä töbäklärneñ aktiv räweştä alıp barılğan eşçänlegennän tış, alarnıñ älege proyektlarnı ğämälgä quyu buyınça şaqtıy bay täcribäle buluın da isäpkä alırğa kiräkter. Bez bügen Tatarstannıñ ere tovar satu tarmaqları tözü buyınça da zur täcribä tuplağanın beldek, respublikada däwlät tarafınnan kredit birelü häm citeşterelüneñ ere eşmäkärlek tarafınnan yaqlanuın xupladıq. Bu yassılıqta awıl xucalığı, az xalıqlı toraq punktlar onıtılmawı, däwlätneñ alar problemaların çişügä yöz belän borıluı da söyenderä.- dip söyläde Sergey Sobyänin. Anıñ çığışınnan soñ TR Prezidentı Mintimer Şäymiev respublikada "Agrar sänäğät kompleksın üsterü" östenlekle ilküläm proyektın ğämälgä quyu turında söyläde.
Kürgäzmä axırında, Mintimer Şäymiev häm Rusiä qunaqları azıq-tölek tawarları ekspozitsiäse belän tanıştı. Biredä «Tatspirtprom», «Aq Bars – Piträç», Şämärdän häm Qazan it kombinatları, «WAMİN-Tatarstan» häm respublikanıñ başqa awıl xucalığı berläşmäläre produktsiälären kürergä buldı.
Şulay itep, Tatarstan citäkçelege, här kön diärlek Rusiä qunaqların qarşı ala, ölgerep kenä tora. Rusiä prezidentı xakimiäte awıl xucalığı ölkäsendä täcribä urtaqlaşabız diep, Tatarstan prezidentına yänä tuğan kön büläge yasadı.
Ğädel Galämetdinov
