Accessibility links

җомга, 2 декабрь 2016, Казан вакыты 21:13

Washington Yaqın Könçığış tınıçlıq söyläşülärenä iğtibarın arttırırğa wäğdä itä


Düşämbedä Quşma Ştatlarnıñ däwlät sekretare Rice İzrail häm fälästin citäkçeläre belän öçyaqlı söyläşülär ütkärep, Yaqın Könçığıştağı solıx söyläşülären yañartu yulları xaqında kiñäşläşte.

Düşämbedä uzğan söyläşülär däwlät sekretare Ricenıñ, İzrail premyer-ministrı Ehud Olmert häm fälästin prezidentı Mäxmüt Ğabbas belän bergä ütkärgän berençe oçraşuı bulıp tora. Moña qädär ul alarnıñ härberse belän ayırım ğına küreşep kilä ide. İke säğättän artıq barğan şuşı soñğı söyläşülärdän soñ amerikan däwlät sekretare xäbärçelärgä bolay dide:

"Bezneñ öçebez dä ike däwlät qorunı küz aldında totqan cişeleşkä tuğrı bulunı yänä ber rasladı, fälästin däwläte qan qoyış häm terror aşa tua almıy digän fiker belän kileşte häm elekke kileşülärne, şul isäptän yul xaritası planın da qabul itüen rasladı", dide Condoleezza Rice Yirusalimdä İzrail premyerı häm fälästin başlığı belän oçraşqannan soñ.

Berük waqıtta ul yaña solıx söyläşüläreneñ qayçan başlana aluı xaqında älegä alğakiteş bulmadı dip tä belderde. Anıñ süzlärenä qarağanda, Olmert ta, Ğabbas ta kiläçäktä yänä oçraşırğa kileşkän, häm ul üze yaqın aralarda şuşı töbäkkä qaytırğa cıyına.

"Premyer-ministr häm prezident tizdän yañadan oçraşu xaqında kileşte. Alar şulay uq kirtälärne ütü, töbäktä häm xalıqara däräcädä yaqlaw qazanu, solıx eşendä alğa kitü tırışlıqlarında Amerikanıñ qatnaşuın, monı citäkläwen kürergä teläwen qabatladı", dide däwlät sekretare Rice düşämbe oçraşuınnan soñ.

Ul aldan uq, bu oçraşudan ällä ni zur näticälär kötärgä kiräkmi digän qaraşnı alğa sörgän ide. Xäbärçelärgä dä ul söyläşülärne "fiker alışular" dip bäyäläde.

Üz yağınnan İzrail premyer-ministrı Olmert yäkşämbedä, İzrail häm Quşma Ştatlar, yaña fälästin xökümäte yähüd däwläteneñ yäşäw xoquqı buluın tanımasa, anıñ belän xezmättäşlek itmäskä kileşte, dip beldergän ide:

"Dürtlek, yäğni Yaqın Könçığıştağı solıx eşlären alıp baruçı dürt tarafnıñ şartların ütämägän fälästin xökümäte tanıla almıy. Anıñ belän bernindi dä urtaq eş bulmayaçaq. Min bu xaqta Quşma Ştatlar prezidentı belän dä söyläştem häm bezneñ qaraşlarıbız bu mäs''älädä ber. Dürtlek taläplären qabul itmägän fälästin xökümäte mäs''äläsendä bezdä tulı añlaşu häm kileşü bar", di İzrail premyer-ministrı Ehud Olmert.

Şuşı ay başında Söğüd Ğäräbstanınıñ Mäkkä şähärendä fälästin prezidentı Mäxmüt Ğabbas citäklägän Fatah törkeme häm anıñ xakimiättäge köndäşe radikal Xämas xäräkäte arasında, fälästin cirlärendäge säyäsi krizistan çığu maqsatında urtaq xökümät qoru xaqında kileşengän ide. Xämas haman da İzrailne tanımıy häm üz maqsatlarınıñ berse itep yähüd däwläten yuq itüne quya.

Kärim Kamal
XS
SM
MD
LG