Accessibility links

сишәмбе, 6 декабрь 2016, Казан вакыты 03:50

İctimaği oyışmalar üzläre xäyriägä moxtac


Хäyriäçelekkä bağışlanğan yılnıñ ikençe ayı uzıp bara. Tatarstanda xäyriä yılında moxtaclarğa yärdäm kürsätü niçek bara soñ? Bu eştä ictimaği oyışmalarnıñ role nindi? Düşämbe könne Äfganstan suğışı invalidları ictimaği oyışması binasında ütkärelgän tügäräk östäl ictimaği oyışmalarnıñ şäfqät'lelek çaralarına bağışlanğan ide.

Tügäräk östäldä respublikanıñ sotsial' yaqlaw ministrı Klavdiä Novikova, Däwlät Şurasınıñ sotsial' säyäsät komitetı räise Çıñğız Mäxmütov, respublikanıñ cämäğät pulatı äğzäläre, ictimaği oyışmalarnıñ citäkçeläre qatnaştı. Sotsial' yaqlaw ministrı üz çığışında, xäyriä yılınıñ berençe aylarında uq respublikada bu uñaydan küp kenä çaralarnıñ ütkärelüen bilgeläp ütte. Näticädä Tatarstanda 1,5mln sum xäyriä aqçası cıyılğan, alarnı tuplawda 200läp metsenat qatnaşqan, dide Klavdiä Novikova. Ministr äytüençä, respublikadağı här oyışma, şul isäptä ictimaği oyışmalar da xäyriä yılı uñayınnan çaralar isemlegen buldırğan.

Ämma tügäräk östäldä ictimaği oyışma citäkçeläre kübräk üz oyışmalarına kiräk bulğan yärdäm turında süz alıp bardı. Böyek Watan suğışı veterannarı ictimaği oyışmasınıñ citäkçese Äxät Yulaşev - veterannar xäyriäçelek eşendä üz öleşen kertkän inde, xäzer alarnıñ üzlärenä yärdäm bik kiräk, dide. 80-90 yäşlek veterannar bügen invalidlıq ala almıyça integä ikän. Anı alır öçen suğış tämuğın uzğan äbi-babaylarnıñ sälämätlek saqlaw oyışmalarına yörergä mömkinlege yuq. Alarğa yärdäm itü maqsatınnan Äxät Yulaşev üze ük äğza bulıp torğan respublikanıñ cämäğät pulatasına möräcäğät itep qarağan, ämma ul anda añlaw tapmağan. Tügäräk östäldä Klavdiä Novikova invalidlıq alırğa telägän veterannarnıñ isemlegen tözergä quştı.

Äfganstan suğışı invalidlarınıñ ictimaği oyışması räise urınbasarı Sergey Murnov äytüençä, äfgan oyışması äğzäläre başqa oyışma wäkillärennän ayırmalı bularaq, härwaqıtta da üzläre eşläp aqça alırğa tırışa häm moxtac bulğan respublikadağı barlıq äfgançılarga da yärdäm itep tora. Ämma xäzer oyışmanıñ eşe bik awır bara. Oyışma ofisı da yabılırğa tora, dide oyışma räise urınbasarı Sergey Murnov.

Yäğni ictimaği oyışma citäkçeläre däwlätne üzlärenä qarata märxämätleräk buluın soradı. Ä xäyriäçelekne üsterüdä respublikada başqarası eşlär äle şaqtıy küp. Tatarstanda xäyriäçelek turındağı qanun da äle qabul itelmägän. Döres, elek mondıy qanun Tatarstanda bulğan, ämma Rusiäneke belän qarşılıqlar bulğanğa kürä, anıñ eşçänlege waqıtlıça tuqtatılğan. Monnan tış çit ildäge kebek eşmäkärlekne salımnan azat itü Kodeksın buldıru da zarur.

Al'bina Zäynulla

XS
SM
MD
LG