Accessibility links

якшәмбе, 11 декабрь 2016, Казан вакыты 13:14

Tatarstanda Ana tele könenä äzerlek bara


Xalıqara Ana tele köne dönyada 2000 yıldan birle bilgeläp ütelä. Älege bäyräm 1999 yılnıñ noyäberendä YUNESKO tarafınnan bilgelände. Ana tele köne näq menä 21 fevral’dä Bangladeştağı waqiğalarnı iskä alıp bilgeläp ütelä. İlleläp yıl elek şuşı könne Pakstannıñ könçığışında üzläreneñ Ana telläre – bangl telenä däwlät statusın birüne taläp itkändä 5 student häläk bula. Bu könne bilgeläwneñ maqsatı – dönyada törle tellärne saqlaw, alarnı üsterügä iğtibarnı yünältü. Çönki YUNESKO mäğlümätlärenä qarağanda, cir şarında qullanuda bulğan 6 meñnän artıq tellärneñ yartısına bügenge köndä yuğalu qurqınıçı yanıy. Tatar tele älegä yuğalu aldında tormasa da, bezneñ Ana tele aldında torğan problemalar da bixisap. Alarnı ber könne - 21 fevral’dä genä xäl itep bulmıy älbättä, alay da tel mäs’äläsenä östämä iğtibar yünältü zıyan itmi.

Tatarstanda Ana tele köne berniçä yıl däwamında bilgeläp ütelä. Ğädättä aña bağışlanıp törle cıyılışlar, tügäräk öställär, konferensiälär, kürgäzmälär ütä respublikada. Bıyılğı çaralar yıldağığa qarağanda azraq planlaştırılğan. Citmäsä alar xaqında da, Ana tele köne turında da mäğlümät çaralarında ällä ni mäğlümät kürenmi. Ällä çaraları bik waq tıyıldı jurnalistlarğa, ällä xäbär itüçe bulmadı. Şuña da, Tatarstanda Ana tele köne niçek uzu turında tulıraq mäğlümät alır öçen bez respublika xökümäteneñ Mädäniät häm Tatarstan respublikası xalıqları tellären üsterü bülegeneñ baş kiñäşçese Firaya Şäyxievağa möräcäğät ittek.

Bıyıl Ana tele uñayınnan Tatarstanda alay ällä ni zur konferensiälär ütkärelmi. Läkin respublika yuğarı uqu yortları rektorları Şurasınıñ utırışı şuşı köngä täğäyenlängän. Anda tellär turındağı qanunnıñ yuğarı uqu yortlarında ütälüe, däwlät tellärendä belem birü turında söyläşü bulaçaq. Şulay uq Qazanda mädäniätlär dialogı digän fänni-ğämäli konferensiä häm başqa şundıy çaralar qaralğan. Ğomumän, Tatarstanda Ana tele uñayınnan oyıştırıla torğan çaralar arta, alarnıñ eçtälege tiränäyä bara, här mäktäptä, här oyışmada anıñ üzençälekläre, üz tösmere buldırıla

Respublikada Xalıqara Ana tele köneneñ ähämiäte kimemime digän sorawğa, barlıq Rusiä töbäklärendä älege kön bezdäge kebek zurlap ütkärelsä bik äybät bulır ide äle, dide Firaya Şäyxieva.

Şulay uq ul Ana tele köne uñayınnan qazanda tel mäs’äläsenä bağışlanğan berniçä kitap näşer itelüe xaqında da äytte. Şunısı qızıq, alar arasında Kazanskiy al’manax digän jurnal da bar ikän. Anda rus telendä yazuçı tatar icatçılarınıñ äsärläre dönya kürgän. Ä bit älegä qädär Ana tele köne digändä tatarlar öçen tatar tele dip küz aldında totıla ide. Ämma xäzer Qazanda bar cirdä dä diärlek urısça ğına söyläşkän corda bu üzgärep kilä kebek.

Gölnaz İlgizär

XS
SM
MD
LG