Accessibility links

Кайнар хәбәр

Rusiä Çexiä häm Polşanı kisätä - alarğa qarşı kiläçäktä raketalar töbälä ala


Kiñäşläşülär öçen kürşe Pol''şağa kilgän Mirek Topolanek, Çexiä premyer-ministrı, düşämbedä poläk wazifadaşı belän kiñäşläşülär ütkärde, häm şunnan soñ ike yaq ta üz illärendä Quşma Ştatlarnıñ raketalardan saqlanu sisteması öçen kiräkle qorılmalarnı qabul itärgä riza bulaçağına işarä itte. Rusiä moña şaqtıy kisken cawap birde.

Çexiä häm Pol''şa Washington belän, amerikannarnıñ raketalardan saqlanu sisteması qorılmaların üzlärendä tözü ixtimalı turında söyläşülär başlarğa äzer - çex premyerı Topolanek Warşawda poläk xökümäte citäkçese Jaroslaw Kaczynski belän oçraşqannan soñ düşämbedä şulay dip belderde:

"Bezneñ ike il dä xäzer amerikan täqdimenä cawap äzerläw çorında. Bez şulay kileştek ki, şul täqdimgä ike il dä uñay cawap birer tösle. Häm şunnan soñ ğına inde bez bu xaqta söyläşülär başlayaçaqbız", dide çex premyerı Mirek Topolanek.

Washington bäyän itkän planda 2012-nçe yılğa qädär Pol''şada yaña saqlanu sistemasınıñ raketa nığıtması, ä Çexiädä şunı xezmätländeräçäk radar üzäge açılırğa tieş. Bu xaqta süzlär inde küptännän yörsä dä Quşma Ştatlar täqdimne 2007-nçe yıl başlanu belän genä yasadı. Ämma Praga da, Warşaw da andıy ixtimalnı inde küptännän tanıp kilde. Xäzer menä şuşı ike il citäkçelege üz rizalığın açıqtan-açıq kürsätä.

Berük waqıtta Kaczynski dä, Topolanek tä amerikannar qorğan yaña saqlanu sistemasınıñ Rusiägä tügel, ä İran, Tönyaq Koreä kebek citäkçelege totrıqlı bulmağan illärgä qarşı yünäldereläçägen täqrarlıy. Tik Mäskäwne bu hiç kenä dä qänäğätländermi, Rusiä fikerençä, Könbatış monı näq menä aña qarşı eşli.

Rusiäneñ tışqı eşlär ministrı Sergey Lavrov:

"Quşma Ştatlarnıñ Yewropada raketalardan saqlanu sisteması öleşlären urnaştıru plannarına, monıñ Yewropadağı ğädäti qorallar kileşüenä yanawına bez bik citdi borçılabız. Elekke ışandırularğa qaramastan, NATOnıñ kiñäyüe dä ike aradağı ışanıçnı hiç nığıtmadı. Bez şul berlek infrastrukturasınıñ Rusiä çiklärenä yaqınlaşuına bik borçılabız", di Sergey Lavrov, Rusiäneñ tışqı eşlär ministrı.

Mäskäw mondıy belderü belän genä çiklänmäde, annan qırısraq süzlär dä kilde. Rusiäneñ strategik raketalar köçläre başlığı general Nikolay Solovsov, ägär dä Çexiä häm Pol''şada amerikannarnıñ raketalardan saqlanu qorılmaları urnaştırıla ikän, alarğa Rusiäneñ raketaları töbälä ala, bez 1987-nçe yılda ireşelgän, Yewropada qısqa häm urta aralı raketalar sanın kimetüne küz aldında totqan kileşüdän çığaçaqbız, dip kisätte.

"Ägär dä Rusiä citäkçelege tarafınnan bu turıda säyäsi qarar qabul itelä ikän, strategik raketalar köçläre Çexiä häm Pol''şağa höcüm itärlek xäldä bula ala", dip kisätä Rusiä generalı Solovsov.

Moña qädär Mäskäwneñ şundıy qırıs belderü yasağanı yuq ide. NATO Solovsov süzlären "çamadan tış xisle eçtälekle" dip bäyäläde, andıy belderü öçen nigez yuq dide. İke atna elek kenä prezident Putin Münxendä yasağan çığışında dönyanı yaña "salqın suğış" başlana alu ixtimalı belän qurqıtqan ide.

Kärim Kamal
XS
SM
MD
LG