Accessibility links

дүшәмбе, 5 декабрь 2016, Казан вакыты 13:36

Bulanaş bistäsendä mäçet bulırmı?


Sverdlovski ölkäseneñ könçığış töbägendä urnaşqan Bulanaş bistäse uzğan ğasırnıñ utızınçı yıllarında kümer şaxtası cirlären üzläşterä başlağanda tözelgän. Poseloknıñ nigezen kübesençä biredä tatarlar salğan digän xaqlı fiker yäşi. Äle siksänençe, tuqsanınçı yıllarda ğına biredä sigez-tuğız meñ tatar xalqı yäşi ide. 2002 yılğı xalıq sanı alu näticäläre buyınça, xäzer anda nibarı öç meñgä yaqın tatar qalğan. Bilgele inde, bu xälgä şaxtalar yabılıp eşsez qalu häm demografik wazğıyät yoğıntı yasağandır. Härxäldä, bügen anda yäşäwçe tatar xalqınıñ küpçelege olı yäştä.

Şuña qaramastan, bu tirädä ber genä mäçet tä yuq. Küptän tügel Bulanaş tatarları belän oçraşu waqıtında Yekaterinburg şähärendä eşläp kilüçe Milli media-xolding citäkçeläre Bulanaşta mäçet tözü täqdime belän çığıp, alarğa bu eştä üzlärennän yärdäm wäğdä ittelär. Ni ğäcäp, olı yäştäge qartlar arasında bu täqdim zur yaqlaw tapmadı. “Bezgä mäçet kiräkmi, qartlar ülep bara, anda barıber yörüçe bulmayaçaq” digänräk fiker yañğıradı.

Qızğanıç, sovet ilendä, ateizm çorında şäxes bulıp formalaşqan küp keşe, din qartayğaç, ülär aldınnan ğına kiräk, digän fikerdä tora. “Bez yäş bit äle, duñğız aşasaq ta, araqı eçsäk tä bula, dinne qartayğaç totarbız” digän fikerne dä yış işetergä turı kilä. Bu bigräk tä tatarlarnıñ ruslar arasında erep yuğalırğa yıraq qalmağan, çit traditsiälärne qanına señderep üskän buın yäşägän töbäklärdä şulay.

Bulanaşta mäçet kiräkme? Bu soraw belän bez urta yäştäge millättäşlärebezgä, xälleräk eşquarlarğa möräcäğät ittek. Urman eşläre belän şöğellänüçe Tahir äfände Töxfätullin fikerençä, yäşlärne, balalarnı äxlaqi ruxta tärbiäläw öçen mäçet bik kiräk.

Tahir äfände, xalıqnı kütärep bulsa, mäçet tözeleşenä üze prorab bulıp alınırğa äzer ikänlegen belderde. Mäçet kiräk digän fikerne Bulanaş xastaxanäseneñ baş tabibı Damir Ğarifullin da xupladı. Mäçet bezneñ balalarıbız tatar familiäsen yuğaltmasın öçen kiräk, dide ul.

Bu könnärdä bistädä ğömer itüçe möselmannar mäçet tözü buyınça cıyın uzdırırğa buldılar.

XS
SM
MD
LG