Accessibility links

сишәмбе, 6 декабрь 2016, Казан вакыты 20:52

Kurgan ölkäsendä Ana tele bäyräme


Kurgan ölkäseneñ Safakül rayon üzägendä yäşäwçe böten keşe dä tatarça söyläşä, dip quanuın belderde Tatarstan mädäniät ministrlığınıñ tatar däwlät fol'klorı üzäge mödire Fänzilä Cäühärova. Kurgan ölkäsendä ğomer itüçe millättäşlär yaña ğına tatar tele bäyräme ütkärde. Qazan däwlät universitetı professorı, filologiä fännäre doktorı Färit Yosıpovnıñ äle küptän tügel genä basılıp çıqqan “Safakül tatarları-tarix, tel, xalıq awız icatı” digän kitabın Kurgan yaqlarında täqdim itü bu bäyrämdäge töp çaralarnıñ berse buldı. Kürenekle ğalim bu Tuğan tel bäyrämendä üze dä qatnaştı. Anıñ belän bergä Qazannan universitet dotsentı Oleg Xisamov häm fol'klor üzäge mödire Fänzilä Cäühärova da Kurgan yaqlarına yul alğan ide. Fänzilä Xäkimovna äytüençä, bu kitap Färit Yosıpovnıñ 40 yıldan artıqqa suzılğan ezlänüläre häm tikşerenüläre näticäsendä dönya kürgän.

Kurgan ölkäsendä ütkän tatar tele bäyrämenä kürşe tirädäge Sverdlovski häm Tömän ölkäsendä yäşäwçe millättäşlär dä qatnaşqan. Bu çarağa Kurgan ölkäse xakimiäte dä zur iğtibar birgän. Fänzilä Cäühärova äytüençä, Tuğan tel çarasında qatnaşuçılarnı Kurgan ölkä duması räise Marat İslamov ta qabul itkän. Alar bu oçraşuda Ural artında yäşäwçe tatarlarnıñ tormışı, alarnıñ xäzerge köndä ölkäneñ iqtisadi, sotsial'-mädäni tarmaqlarında totqan urını turında ğına söyläşep qalmağan. Duma başlığı üzeneñ xıyalı belän dä urtaqlaşqan. Ul näselle atlaw ürçetep Ural artın dönyağa tanıtu belän xıyallana ikän.

Kurgan ölkäsendäge Tuğan tel bäyräme waqıtında Ural artında yäşäwçelär Färit Yosıypovnıñ “Safakül tatarları-tarix, tel, xalıq awız icatı” digän kitabına zur baya birelgän. Safaqül tatarların başqa xalıqlarğa tanıtuda armıy-talmıy 40 yıldan artıq alıp barğan xezmätläre öçen Safaqül rayon üzägendäge ber uramğa Färit Yosıpov isemen birü täqdime belän dä çıqqannar. Kurganda häm Safaqüldä yäşäwçe millättäşlärneñ telen, tarixın, ruxi mirasın barlawğa bağışlanğan Tuğan tel bäyräme fevral' ayı buyına ölkäneñ här mäktäbendä, här mädäniät sarayında däwam itäçäk.

Nail-Alan.

XS
SM
MD
LG