Accessibility links

пәнҗешәмбе, 8 декабрь 2016, Казан вакыты 08:58

Serblar häm Kosovo albannarı töbäk kiläçäge turındağı söyläşülärneñ soñğı äylänäsen ütkärä


Ayırım töbäkneñ möstäqillege mäs''äläse, moña üzara kileşep ireşü yulların tabu bügen Austriä başqalasında da qaraldı, xörmätle tıñlawçılar. Vena Kosovo kiläçägen bilgeliäçäk söyläşülärgä kilüçe serb häm albannarnı qabul itte. Ämma anda da yaqlarnıñ ber-beren añlawına ömet ällä ni yuq, Berläşkän Millätlärneñ Kosovo mäs''äläsen bağuçı maxsus wäkile Martti Ahtisaari şundıy fikerdä.

Kosovonıñ kiläçägen bilgeläw turındağı söyläşülär serb xökümäte belän Kosovo albannarı arasında inde ber yıldan artıq bara, ämma şul waqıt eçendä yaqlar ber-berse qaraşların añlap, ber-berenä hiç yaqınaymadı diärgä bula. Belgrad Kosovoğa kiñ moxtariät täqdim itä, ämma bäysezlek turında işetergä dä telämi, ä alban yağı isä şul bäysezlektän başqa närsä xaqında söyläşmäyäçägen äytä.

Şuşı ay başında Martti Ahtisaari, Berläşkän Millätlärneñ Kosovo öçen maxsus wäkile, ber kompromiss plan belän çıqqan ide. Ul qarşılıqlarnı kimetü öçen mondıy yul täqdim itä - Kosovoğa bäysez ber däwlät atributları birelä, ämma ul formal'' töstä bäysez däwlät bularaq iğlan itelmi.

Vena söyläşülärendä Kosovo alabannarı wäkillegen citäklägän Veton Surroi, bez Ahtisaari planına ällä ni zur üzgäreşlär kertergä telämibez, dip belderä. Ul Kosovo albannarın sabır bulırğa öndi, alarnıñ söyläşülär ozaq baru säbäple tuğan qänäğätsezlegen añlawın äytä. Berük waqıtta Surroi, Kosovonıñ tulı bäysezlegenä ireşü maqsatına inde küp qalmadı digän ışanıç ta belderä:

"Yıllar buyı bez bu xäldän qänäğät tügel idek, ämma xäzer bezgä iñ kiräge - şuşı marafonnıñ soñğı öleşen ütü öçen xalqıbıznıñ sabır bulıp qaluı. Bez Kosovonıñ bäysez bulaçağına ışanabız. Bez biregä şuña tirännän ışanıp kildek, häm kire öygä dä şul ışanu belän qaytıp kitäçäkbez", di Surroi, Vena söyläşülärendäge Kosovo albannarı wäkile.

Serbiä wäkillegen citäklägän Slobodan Samarjiç isä üz yağınıñ Ahtisaari planına "alternativ proyekt" täqdim itäçägen äytä. Anıñ süzlärenä qarağanda, Belgrad Ahtisaari planın tulısınça kire qaqmıy, läkin Kosovonıñ bäysezlegenä kisken qarşı çığa:

"Bez plannıñ Serbiä suverenlığın häm anıñ territorial'' bötenlegen bozğan öleşlärenä genä qarşı", di serb wäkile Samarjiç.

Ahtisaari üze, planğa qayber östämälär kertelä ala, tik alar BMO planın tamırdan üzgärtergä tieş tügel, di. Ägär dä ike yaq xäzer Vena söyläşülärendä urtaq qararğa kilä almasa, martti Ahtisaari üz planın Berläşkän Millätlär Oyışmasınıñ İminlek Şurasına yullarğa tieş bulaçaq.

Şuranıñ daimi äğzalarınnan berse, pravoslav Serbiäneñ tarixi berektäşe Rusiä inde, Belgrad kileşmägän, yäğni Kosovoğa bäysezlek birü qaralğan çişeleşkä veto salaçağın aldan uq äytep quydı.

Kärim Kamal
XS
SM
MD
LG