Accessibility links

якшәмбе, 11 декабрь 2016, Казан вакыты 09:05

"Azatlıq"nı "Yaña ğasır"da tapşıru tuqtatıla


Salqın suğış yıllarında, täräzä-işeklärne yabıp, qaçıp-posıp “Azatlıq”nı tıñlağan millätpärwärlärne beläbez. Un yılğa yaqın 1997 yılnıñ avgustınnan başlap “Azatlıq” radiosı respublika däwlät radiosı, annarı “Yaña Ğasır” kanalı aşa cirle dulqınnarda retranslyatsiälände. Demokratiä, açıqlıq häm illärneñ, xalıqlarnıñ xezmättäşlegeneñ ber kürsätkeçe şul ide. Ni qızğanıç, berençe marttan “Yaña Ğasır” radiosı aşa “Azatlıq”nı tıñlaw mömkinlege bulmayaçaq. Çönki Rusiäneñ şuşı mä’sälälärne bağuçı agentlığı “Yaña Ğasır”nıñ litsenziäsendä citeşsezlek tapqan. Bu citeşsezlekne tözätep, litsenziä alu eşen caylaw mäşäqätlären kompaniä citäkçese İlşat Äminov axırına citkerä almadı. Bu üzgäreşneñ çeterekle häm tirän säbäpläre dä bulırğa mömkin. Ä bügengä şunı äytäbez - “Azatlıq”nı tıñlarğa künekkän qärdäşlärebez qısqa dulqınnardan yäki internet aşa ğına tıñlıy ala. “Yaña Ğasır” belän xezmättäşlekne tuqtatmasqa ide. “Azatlıq” tapşırularınıñ qayber özeklären 20 minut külämendä “Yaña Ğasır” aşa efirğa çığaru öçen çaralar kürelä. Kiñäşik äle, niçek tıñlaw caylıraq? “Azatlıq”tan nindi xäbärlär işetäsez, nilär istä qala?

Älbättä, xalıqnıñ küpçelegen sotsial' tormış qızıqsındıra. Äytik, ğinwar ayında cılılıq öçen tüläw kötkännän 2-3 tapqırğa kübräk bulıp çıqtı. Az keremlelär moña äzer tügel. Sişämbe könne Şähär Dumasında şuşı turıda söyläştelär. Küñelsez bulsa da, barıber yañalıq. Respublikanıñ sotsial' iminlät waqife Ostrovskogo uramında yaña binağa küçte. Busı çärşämbe könne buldı, dimäk, yärdäm sorap, taşlama, yullama xästärläp Möştäri uramı tügel, ä Yäş tamaşaçılar teatrı qarşına barırğa kiräk. Ä keşegä xörriät, xaq mäğlümlät, ğomumän azatlıq häm şul isemendäge radio kiräkme? Qazanlılar, ğadi keşelär häm zıyalılar bu turıda ni uylıy? Xäzer alarnıñ fikeren tıñlap kitik:

-Min sezne bik yaratıp tıñlıym. Läkin härwaqıtta radio yanında utırıp bulmıy. Qayçaqta uzdırıp ta cibäräseñ.

- Azatlıq radiosın tıñlıybız. Härber tapşıruın tıñlap bulmasa da , tıñlarğa tırışabız.

- Azatlıq radiosınıñ böten tapşıruları da xäterdä qaldı disäñ dä yarar ide, çönki bezneñ ğailäneñ iñ yaratıp tıñlıy torğan , iñ turılıqlı bulıp qalğan, tatar xalqı turında bik küp mäğlümat birä torğan berdänber radio dip sanıybız bez anı. Häm üz fikeremne äytäsem kilä. Miña bik oşıy Rimzil Wälievnıñ analitik tapşıruları. Nindider, canğa ber räxätlek birä torğan tapşırular programması dip sanıybız.

-Siräk kenä minem dä Azatlıq radiosınnan tapşırularnı tıñlağanım bar. Bigräk tä qızıqsınıp tıñlıym törle regionnardan bulğan daydjest xäbärlärne. Çönki alar törle dialektlarda bara, Başqortstannan ber törle, başqa urıs regionnarınnan törle - törle bula. Şularnı qızıqsınıp tıñlıym.

- Azatlıqnı bik yaratıp tıñlıym . Kötep alam tapşıruların. Azatlıq tapşıruları törle-törle çığanaqlarnı çağıştırıp tıñlarğa yärdäm itä. Xäzer tügäräk östäl tapşıruları alıp barıla başladı, yäkşämbe könnärendä. Anda da bigräk tä Rimzil Wäli ütkärgän waqıtta-ul inde çäynäp qaptıra disäñ dä yarıy.

-Annan soñ bik yaratıp tıñlıym xatın-qız temasına bulğan tapşırularnı. Menä kiçä genä Tayland turında bik qızıqlı ğına itep oyıştırılğan tapşıru ide. Törle- törle fikerlär, bezneñ xatın- qızlarnı dönyadağı başqa il xatın-qızları belän çağıştırıp qararğa mömkinlek birä. Materialnıñ tözeleşe bik küp kamilläşte, tıñlar öçen ciñelläşte.

Açıq mikrofon tapşıruında bälki sorawlarğa cawapnı şul dairägä qağılışı bulğan keşelärdän alırğa kiräkter. Alarnıñ cawapları kompetentlıraq bulır ide. Ä uramda, teläsä kemnän sorawğa cawap işetü ul, xalıq turında nindider ber imidj tudırırğa mömkin. Ä bezneñ xalqıbız belemle, küp belä, küp belgän keşelär kübräk.

Azatlıq radiosın ber dä tıñlağanıbız yuq. Azatlıq radiosı ul törle töbäklärdä yäşäwçe tatarlarnı çağıldıruçı, törle töbäklärdä yäşäwçe tatarlar turında söyläwçe dulqındır dip uylıym.

Açıq mikrofon digän rubrika açıldı. Ul da äybät kenä bara.

Rimzil Wäli, Mälikä Basıyr

XS
SM
MD
LG