Accessibility links

сишәмбе, 6 декабрь 2016, Казан вакыты 20:59

Rusiä-Tatarstan kileşüe kire qağıldı


Federasiä Şurası Rusiä belän Tatarstan arasında wäkälätlärne büleşü kileşüen kire qaqtı. Kileşüne xuplap 13 keşe tawış birde, 93 keşe qarşı çıqtı, 15 keşe tawış birmäde. Federasiä Şurası başlığı Sergei Mironov, tawış birü aldınnan, bu kileşüneñ qabul itelüe – säyäsi yaqtan qurqınıç bulaçaq, dip belderde:

"Kileşüne raslaw – Rusiä Federasiäse subyektlarınıñ tigez xoquqlı bulu prinsipına qarşı kilä häm säyäsi qurqınıç tudıra. Şulay uq bu – Rusiä prezidentı Vladimir Putin soñğı 7 yılda alıp barğan federal reformadan çitkä taypılu bulaçaq."

Tawış birü aldınnan çığış yasağan Tatarstan Däwlät Şurası räise Färid Möhämmätşin isä, Rusiä töbäkläre tigez xoquqlı ämma tigez tügel, dip belderde:

"Bez iqtisadi yaqtan törle, törle tirä-yaq, törle klimat şartlarında kön küräbez, moña küz yomırğa yaramıy, tigez xoquqlar bar, ämma tigezlek yuq. Här töbäkkä mondıy kileşülär aşa üzendäge mexanizmlarnı tabu xoquqı birelgän, federal däwlättä monnan qurqırğa kiräkmi."

Kileşüne Rusiä häm Tatarstan prezidentları 2005nçe yılnıñ üktäberendä imzalağannar ide. Fivral başında anı Rusiäneñ Däwlät Duması rasladı.

XS
SM
MD
LG