Accessibility links

сишәмбе, 6 декабрь 2016, Казан вакыты 23:03

Qazan Dumasında xalıqnı borçığan mäsälälär qaraldı


Qazan Duması sessiäsen ikençe törle mer İlsur Metşin komandasın täqdim itü dip atap bulır ide. Kamil İsxaqovtan soñ citäkçelektäge küp kenä keşelär almaşınuı berkemgä dä ser tügel. İlsur Metşinnıñ isä üz tiräsenä Tübän Qama keşelären cıyuı da bilgele. Şuñadır Tatarstan Prezidentı Mintimer Şäymiev açıqtan-açıq Qazan belän Tübän Qama ikese ike şähär häm anda alıp barılğan wäzğıät monda turı kilmi dip işarä itte. Ni disäñ dä “Tübänkamaneftexim“ kebek aqça birüçe öre şirqat'lär, neft' Qazanda yuq, şuña aqça tabunıñ başqa yulların, yäğni beraz tir tügärgä kiräk bulaçağı assızıqlandı. Bilgele ki, monıñ öçen keçe eşmäkärlekne üsterü taläp itelüe äytelde.

Mintimer Şäymiev bu yunäleştä yaña citäkçelegen tänqitläp uzdı. Ğomumän Qazan şähäre citäkçelegenä bu könnärdä tänqitlär şaqtıy bulğaladı. Başqarma komitet citäkçese Marat Zahidullovqa 20 fevral' könne Şähär Duması deputatları cılılıq energiäsenä buyınça şaqtıy sorawlar birdelär. Bilgele bulğança, qayber xucalıqlarğa fatir bäyäläre 2-3ләтә artıp kilde. Bu “Kazenergo”ğa qarağan yortlar. Şuña “Tatenergo”nıqı belän urtaq bäyä bilgelärgä kiräklege äytelde.

Sessiädä Prezident Mintimer Şäymiev äkrenläp barlıq yortlarnı “Tatenergo”ğa kertäçäkbez, Kamil İsxaqov bulğanda anı şul räweşle eşläsäk xalıqqa yaxşıraq bulaçağına ışandırıp almadıq dide. Monnan tış transport häm yullar buyınça da fikerlär äytelde. Bilgele bulğança, “Berdäm Rusiä” million xalqı bulğan şähärlärgä, şul isäptän Qazanğa da 1 milliard sum aqça birergä wäğdä itkän ide. Ul aqçalar isä 2008 häm 2009 yılda da bireläçäk ikän. Dimäk inde 3 milliard sum bulaçaq. Annarı 500 meñ xalıq yäşägän şähärgä tağın milliard yarım aqça quşılaçağı assızıqlandı.

Şulay uq sessiädä qayber ministr häm oyışma citäkçelärenä eläkkäläde. Mäsälän mäktäptäge tabipları buyınça bäxäs buldı. Alarnıñ xezmät xaqları 3 meñgä dä tulmaw säbäple xezmätkärlär citeşmi ikän. Barı 60 protsent qına eşli. Mintimer Şäymiev älege mäktäp tabiplarınıñ Mäğärif ministrlığına qarağanlığın belgäç aptıraşta da qaldı, alar başqa tabiplar kebek ük buluın äytte. Ministr Kamil Zıyätdinovnı bastırıp soradı.

Şulay uq sotsial' ipoteka nigezendä fatir alu mäs’äläsenä dä tuqtaldılar. Yäş ğailälärgä byudjet oyışmasında eşläwçelärgä qarağanda da kübräk fatir birelüe äytelde. Tatarstan toraq fondı citäkçese Tälğät Abdullin monıñ belän kileşmäde. 900 fatir tözergä tieş bulsaq, bez 1 meñ yarım tözedek. Häm şul artıq tözelgänneñ 300ен yäş ğailälärgä birdek dide. Mintimer Şäymiev isä Rusiä töbäklärendä dä älege sotsial' ipoteka belän qızıqsınuların häm xatlar küp kilüen äytte. Bälki bezgä başqa töbäklärdän dä yaxşı belgeçlärne cälep itär öçen fatir birüne oyıştırırğadır dip äytte. Läkin berençe çiratta qazannarğa birergä kiräklegenä işarä itte.

Ğomumän Qazan şähäre Duması sessiäse canlı uzdı. Mer İlsur Metşin Qazan mäktäplärendä buşqa birelä torğan vitaminlı söt belän maqtanıp prezidentnıñ käyefen kütärde. Qıtayda xalıq şunıñ yärdämendä ozın buylı bulıp üsä dide. Kiläçäktä mäktäplärdä töşke aşlar da buşqa bulaçağın wäğdä itte, Qazan merı. Şulay uq oçqıçlar mä’säläsenä tuqtaldılar. Qazannıñ oçqıçlar citeşterüçe oyışması zakazlarnı üti almıy ikän. Şäymiev isä Mäskäw aldında xätta oyat buluın äytte.

Sessiädä Qazan şähäre yaña citäkçelegeneñ plannarı, ömetläre ay-hay zurdan buluı kürende, ämma alarnı äle tormışqa da aşırırğa kiräklegenä basım yasadı Mintimer Şäymiev.

Landış Xarrasova

XS
SM
MD
LG