21 fevral'dä Rusiä Federatsiä sovetında Tatarstan belän Rusiä Federatsiäse arasında wäqälätlärne üzara büleşü turındağı Şartnamä küpçelek tawış belän kire qağıldı. Älege Şartnamäneñ raslanmawına Başqortstan wäkilläre dä üz öleşlären kerttelär.
Elek xäbär itkänebezçä, 9 fevral'dä Tatarstan Şartnamäse Rusiä Däwlät dumasında raslanu çarası ütkändä, Dumadağı Başqortstan deputatları barısı da Şartnamägä qarşı tawış birdelär. Federatsiä sovetında da Başqortstan wäkilläre Tatarstan Şartnamäsenä ayaq çaluda qatnaşqannar. 21 fevral'dä, Rusiä Federatsiä sovetında Tatarstan Şartnamäse buyınça tawış birü näticäläre bilgele bulğaç ta, räsmi Ufa bu waqiğağa mönäsäbäten Başqortstan prezidentınıñ matbuğat sekretare Rostislav Morzagulov aşa yañğırattı. Regnum mäğlümat agentlığına birgän interv'yusında Rostislav Morzagulov şulay di: “Respublika citäkçelege federatsiä subyektları tigezlegen yaqlap çığa häm federal' üzäk barlıq töbäklärgä dä ber törle qarar dip ömetlänä. Ägär wäqälätlärne büleşü turındağı şartnamä Rusiäneñ berär töbäge belän imzalansa, Başqortstan da federal' üzäk belän şundıy uq mönäsäbätlär qorırğa xaqlı. Ämma, ägär ber genä töbäkkä bulsa da bu röxsät itelmäsä, şartnamä berkemdä dä bulırğa tieş tügel”.
Şulay itep, Başqortstan citäkçelege Tatarstan Şartnamäsenä ayaq çaluın, şundıy uq Şartnamäneñ Başqortstanğa da wäğdä itelmäwe belän “añlatırğa” uylıy. Çınbarlıq qatlawlıraq bulırğa tieş. Alar turında yäkşämbedäge atnalıq küzätüdä işettereler.
Kärim Yauış, Ufa
