Accessibility links

якшәмбе, 4 декабрь 2016, Казан вакыты 21:27

Başqortstan wäkilläre Qazan kileşüenä qarşı


Tatarstannıñ Rusiä belän üzara wäqälätlärne büleşüe turındağı Kileşüe yazmışı bu könnärdä Başqortstan cämäğätçelegeneñ dä iğtibar üzägendä qala. Älege Kileşüneñ Rusiä Federatsiä Şurasında raslanu ütä almawı Başqortstanda bu xälgä qapma-qarşı mönäsäbätlär buluın tağın ber qat rasladı.

Başqortstan räsmi citäkçelege Tatarstannıñ Kileşüeneñ Federatsiä Şurasında yaqlaw taba almawına üzeneñ açıqtan-açıq fikeren beldermäde. Ämma başta respublikanıñ Däwlät Dumasıyndağı wäkilläreneñ, annan soñ Federatsiä şurasındağı ike senatorı Rudik belän Ramil İsqucinnarnıñ da bu Kileşügä qarşı çığuı qıyıqlatıp bulsa da, Başqortstan räsmi xakimiätläreneñ dä bu Kileşügä qarşı buluına işarä, älbättä.

Älege xäl Başqortstan tatar cämäğätçelege arasında bik nıq ğäcäplänü uyattı. Niçek inde tuğandaş respublika bulıp sanalğan Tatarstannıñ izge teläklärenä qarşı çığarğa mömkin, digän soraw küplärne uylandıra. Şul uq waqıtta Başqortstannan Rusiä Däwlät Dumasına saylanğan deputatlar älege kierenkelekneñ kilep çığuına Duma deputatı Oleg Morozov ğäyeple dip sanıy. Şuşı uq fikerne Dumadağı deputat Mansur Äyupov ta Ufada atnakiç könne jurnalistlar belän oçraşuında belderde. “Ägär Oleg Morozov Mäskäw belän Kileşügä barı tik Tatarstan belän Çeçnya ğına ömet itä ala, digän belderüen yasamağan bulsa, Başqortstan da qarşı mönäsäbät kürsätmägän bulır ide”, - di ul.

Mäğlüm buluınça, Mansur äfände dä, Başqortstannan saylanğan başqa deputatlar da Tatarstan Kileşüenä därräw qarşı tawış birgän ide. Menä şuşı xäl Tatarstan belän Başqortstan arasındağı mönäsäbätlärneñ bozıluına kitermäsme, digän sorawnı da birde jurnalistlar. Aña ber mantıqiy ğına cawap taba almadı Mansur Äyupov. “Minemçä, bozılmasqa tieş”, dip kenä cawapladı ul.

Ämma anıñ fikere belän Başqortstandağı qayber säyäsät belgeçläre kileşmi. Misal öçen, tanılğan etnosäyasät belgeçe İldar Gabdrafıykov ike arada salqınlıqnıñ artaçağın äytä. “Bezneñ ike respublika arasında mönäsäbätlär Başqortstan xakimiätläreneñ uylap citkermägän ğämälläre arqasında moñarçı da qatlawlı ide, soñğı waqiğalar isä Başqortstan räsmi dairäläreneñ Tatarstan belän yaqınayırğa telämäwen ayıruça açıq kürsätte, - di İldar äfände. – Tatarstan belän Rusiä arasındağı Kileşü irtäme-soñmı barıber raslanır, läkin Başqortstan tarafınnan ayaq çalular küñeldä yuşqın qaldıraçaq, monısı inde bäxässez”.

XS
SM
MD
LG