23 fevral' - Watannı saqlawçılar könendä Ufada da här cirdä tantanalı çaralar küp ütte. Räsmi çaralarnı comğa irtäsendä bulğan tantana başlap cibärde. Respublika Prezidentı, Premyer- ministr häm başqa yuğarı citäkçelär bäyräm uñayınnan Ufanıñ Ciñü parkına barıp, andağı mäñgelek ut aldına, şulay uq ike tapqır Sovetlar Soyuzı Geroe Musa Gäräev qäberenä çäçäklär saldı häm ber minut tın qalıp iskä aldı.
Tağın ber üzençälekle çara Ufanıñ “İxlas” mäçetendä ütte. Biredä mäçetneñ imam-xatibı, tatar imamı Möxämmät xäzrät Ğälläm fatıyxası belän, möselman yäşläre cıyıldı. “İslam mädäniäte mirası” digän ictimaği oyışmağa kerüçe möselman yäşläre Watannı saqlawçılar könen näq menä “İxlas” mäçetendä cıyılıp, çın islamça bilgeläde. Başqa küp kenä yäşlär bu könne xämer çömerep, uramda alpan-tilpän macaralar ezläp yörgändä, tatar, başqort yegetläre, Ufada yäşäwçe başqa möselman milläte wäkilläre matur ädäbi-muzıykal' kiçä oyıştırıp küñel açtı.
“Törki yäşlärebezdän şundıy kiçä ütkärü turında möräcäğät bulğaç, bez, ike dä uylamıyça riza buldıq”, - dip söyli mäçetneñ imam-xatibı Möxämmät xäzrät.
“Mondıy çaralarnı aldağı yıllarda da oyıştıraçaqbız, - di Möxämmät xäzrät. – Millät yäşlärebez islam nigezlärendä saw-sälamät tormış alıp barsa, zamana çirläre bulğan eçkeçelek, narkomaniä belän mawığuçılar da kimi barır, inşalla”.
Fänis Fätxi, Ufa
