Accessibility links

чәршәмбе, 7 декабрь 2016, Казан вакыты 11:44

Qazanda Bexterevnı iskä aldılar


Vladimir Bexterewnı isäk alu çaraları Qazan däwlät universitetında oyıştırıldı. Monnan 120 yıl elek Bexterev universitetnıñ psixik häm nerv awıruları kafedrasınıñ professorı bula. Ğalim keşelärneñ nerv sistemasın, anıñ tözeleşen, mömkinçeleklären häm awıruların nıqlap öyränä. Psixika eşçänlegen öyränüçe Rusiädä iñ berençe laboratoriä dä Bexterev tarafınnan oyıştırıla. Alay ğına tügel, yaqtaşıbız köçe belän Sankt Peterburgta psixonevrologiä institutı da barlıqqa kilä.

Ğalimneñ 150 yıllığına Qazan universitetında Bexterev eşçänlegen däwam itüçe tabiplar qatnaşında tantanalı utırış oyıştırıldı. Universitetnıñ töp binası yanında Bexterev isemen mäñgeläşterüçe memorial' taqta açıldı, ğalimneñ häykälenä çäçäklär salındı. Vladimir Bexterev turında respublikanıñ psixiatriä xastaxanäseneñ bülek mödire Rawil Välitovnıñ fikeren tıñlap kitik:

Tatarstan öçen böyek yaqtaş 1857 yılda Alabuğa yaqlarında tua. Sankt Peterburgnıñ xärbi akademiäsendä belem ala häm Qazanğa 27 yäşendä professor bulıp qayta. Bexterev psixiatr ğına tügel, ul anatom da, nevrolog da, ul psixiatr da, psixolog da, balalarnıñ psixikasın bik täfsil'läp öyrängän ğalim.

Bexterewnıñ xezmätläre bügenge kön öçen dä aktual'legen yuğaltmıy. Bügen tabiblar çañ suğa, çönki xalıqnıñ ruxi sälämätlege kisken naçarlana bara. Bu bilgele sotsial'-iqtisadi şartlar belän dä, keşelärneñ yäşäw räweşe belän dä bäyle. Statistika mäğlümatlarına qarağanda ildä soñğı un yılda psixik awırular xätta 26 %qa artqan. Tabip Rawil Välitov däwam itä:

Qızğanıçqa qarşı, bügen psixik awırular yäşlär arasında, olılarda da kübäyä bara. Anıñ säbäpläre törle. Şul isäptä sotsial' yağı möhim. Alkogol', narkotiklar qullanu arqasında da awırular kübäyä. İñ kiñ taralğan awırularnıñ berse - depressiä. Näq anıñ arqasında küp keşe üz teläge belän dönyadan kitä. Küp oçraqta keşeneñ psixikası üzgärüe tormış awırlığı belän bäyle.

Xörmätle tıñlawçılar, sez Tatarstannıñ psixiatriä xastaxanäseneñ bülek mödire Rawil Välitovne tıñladığız. Psixik awırunıñ tarixı - ul ütkän tormışnıñ tarixı sanala. Näq psixiatriädä däwlätneñ barlıq problemaları da çağılış taba. Çirattağı üzgärtep qorular, faciğälär yañadan yaña awıru tarixların “yazaçaq”.

Al'bina Zäynulla

XS
SM
MD
LG