Accessibility links

пәнҗешәмбе, 8 декабрь 2016, Казан вакыты 23:10

İran ğälämgä berençe raketa oçırdı


İran däwlät televideniäse, ğälämgä berençe raketa oçtı dip xäbär itte. İrannıñ ğälämne öyränü üzäge başlığı Mohsen Nahrami, raketa Fän häm Texnologiä wä Saqlanu ministrlıqlarınıñ urtaq eşe dip beldergän. Fänni üzäk başlığınıñ urınbasarı Ali Akbar Golrou, raketa 150 çaqrımğa oçıp kire qayttı, dip xäbär itte.

Bilgele bulğan barlıq mäğlümat şul – raketa ğalämgä oçqan. Ämma qaydan häm anıñ eçendä närsä buluı – älegä bilgesez bulıp qala.

İrannıñ ğälämne öyränü üzäge başlığı Mohsen Bahrami, raketa eçendä – fän häm saqlanu ministrlıqlarına tikşerenü öçen kiräk bulğan maddälär bar, dip belderde. Raketa oçırılğançı, kiräk bulğan barlıq sınawlar – xalıqara qanunnar qısalarında cirdä uzdı, dip östäde Bahrami. İranda bu ay belän yıl tämamlana, Bahrami, - raketanı oçıru – ber yıllıq eşçänlekkä näticä, dide.

Şimbä 24 fivral könne köndälek Etemed e-Melli isemle basma, saqlanu ministrı Mostafa Möhämmäd Nacar süzlären kiterep, "saqlanu ministrlığınıñ planı – iärçen häm anı ğälämgä oçıru maşinasın tözep ğäläm klubına kerü" dip yazıp çıqqan ide. Räsmi İRNA mäğlümat agentlığı bügen fän häm texnologiä ministrınıñ, İran üzeneñ ğäläm programması tärräqiäten tizlätergä tieş digän süzlären bastırdı. Ministr Möhämmäd Söläymani, "ğäläm eşläre küp waqıt häm citdilek taläp itä, ämma bez anı tizlätü yulların ezlibez", digän.

2005nçe yılnıñ üktäberendä, İran, üzeneñ Rusiä raketasında Rusiädä eşlängän iärçenen ğälämgä oçırğan ide. Sina-1 iärçene – moñarçı İrannıñ berdänber iärçene buldı. Räsmilär här waqıt aldağı yıllarda tağın berniçä iärçenne oçıru plannarı turında äytep kilde.

Böten bu xäbärlär İrannıñ – könbatış belän atom programması mäsäläsendä kierenkelekneñ arta barğan çorına turı kilde. Prezident Mähmüd Äxmädinecad, İran atom yağulığı citeşterergä öyrände häm il tuqtıy belmägän häm kire çigenmägän poez kebek alğa bara, dip äytkän. Tışqı eşlär ministrı Manuçer Mottaqi, İSNA xäbärlär agentlığına, "bez üzebezne här wazğiätkä, xattä suğışqa äzerlädek," dip beldergän.

Alsu Qormaş
XS
SM
MD
LG