Accessibility links

дүшәмбе, 5 декабрь 2016, Казан вакыты 13:29

Sotsial ipoteka programı härkemgä ütemleme?


Härkemgä ütemle toraq programması ölkäsendä Tatarstan Rusiädä iñ alğa kitkän töbäk bularaq sanalıp kilde – moñarçı. Çınlıqta isä bezneñ respublikanı da uzdıruçılar bar ikän - Çuaşiä. Küptän tügel Tatarstan Däwlät Şurası deputatları Çabaqsar şähärendä bulıp täcribä urtaqlaşıp qayttı. Sişämbe könne isä ütemle häm uñaylı ilküläm proyektın tormışqa aşıru yünäleşendä uzğan Tatarstan Däwlät Şurası komissiäseneñ utırışında da Çuaşiä misal itep kiterelde. Älege utırışta Krasnodardan kilgän delegatsiä wäkilläre dä qatnaştı.

Ütemle toraq turında soñğı waqıtta küp söylänsä dä, ul bik sanawlı häm haman da näq şul aqçası bulğannarğa ğına ütemle bulıp qala. Çönki älege sotsial' ipoteka belän fatir alu öçen şaqtıy ğına tir tügärgä kiräk. Ä sin tir tükkändä isä fatir alunıñ inde tärtipläre dä üzgärep quya. Bilgele bulğança, küptän tügel inde respublikanıñ törle cirennän toraq alırğa mömkinlek bulsa, xäzer qayda yäşiseñ barı şunnan ğına ala alasıñ.

Sişämbe könne Tatarstan Däwlät Şurasınıñ “Rusiä grajdannarına ütemle häm uñaylı toraq” ilküläm proyektın tormışqa aşıru komissiäse utırışında andıy mäs'älälä qaralmadı. Deputatlar ul problemanı belep tä betermilär küräseñ. Fatir alır öçen dokument tapşıru urınnarında xätta xalıqqa kiräkle töstä añlatu da alıp barılmıy. Mondıy neçkäleklär bixisap.

Utırışta isä härwaqıttağıça matur sannar kiterelde. Uzğan yılnı 7 meñnän artıq ğailä sotsial' ipoteka nigezendä fatir aldı dielde. Alarnıñ kübese byudjet tarmağında eşläwçelär häm yäş ğailälär dielde. Tağın şul uq aqçalı keşelär. Çönki xezmät xaqı 10 meñnän dä kim bulğan keşelärgä älege programma nigezendä fatir ala almıy. Şuñadır qayber deputatlar utırışta bu programma çınnan da bik tübän xezmät xaqı aluçılar öçen bulırğa tieş dip täqrarlarğa tırıştı.

Tatarstan toraq fondı citäkçese Tälğät Abdullin härkemgä toraq ütemle, fatir bäyäläre artuğa qaramastan aluçılar artqannan-arta dide. Xäzer inde küplär berniçä fatir alıp aqça da eşläwlären äytte.

2006нчы yılnı Qazanda fatirnıñ urtaça kvadrat metrı 16 meñ 500 torsa, yıl azağına inde ul 30 meñgä yaqın buldı bermä-ber arttı. Läkin xäzer ul bäyägä dä fatirnı barı şähär çitendä genä alırğa mömkin. Utırışta deputatlar ni öçen bäyäneñ kinät kenä şulay üsüen açıqlarğa tırıştılar. Kemder anı tözeleş materiallarınıñ qimmätlänüe belän añlatsa, çınlıqta belgeçlär fatir bäyäläreneñ üsüen cirneñ qimmätlänüenä bäyle dip belderdelär. Häm kiläçäktä äle bäyä artunıñ däwam itüe bik mömkinlege äytelde. İpoteka nigezendä fatir alırğa tezläwçelär arta, ä toraq isä ul qädär tiz tözelmi dielde utırışta. Dimäk problemalar bu yünäleştä arta ğına baraçaq.

Landış Xarrasova

XS
SM
MD
LG