Accessibility links

дүшәмбе, 5 декабрь 2016, Казан вакыты 07:32

Kamal teatrı Mäskäwdä festivaldä qatnaştı


Mäskäwdä uza torğan muzıkalı spektakllärneñ “İkençe milli festivalendä” qatnaşırğa xoquq alğan Tatarstannıñ Ğäliäskär Kamal isemendäge teatrı şuşı festival'' qısalarında Mäskäw tamaşaçısına “Qara çikmän” spektaklen kürsätte. “Teatrnıñ muzıka yöräge” dip atalğan ul festival'' 2005 nçe yılda ğına barlıqqa kilgän. Festival''neñ iñ yaxşı säxnä äsärlären saylawçı belgeçläre finalğa 25 säxnä äsären çığarğan. Şul spektakl''lärgä urınnar 18 nominatsiädä bireläçäk. Ciñep çığuçılarnı büläkläwlär 2007 yılnıñ 1 martına bilgelängän.

Mäskäwneñ üzägendä tügel çittäräk torğan teatrlarnıñ bersendä, bu qışnıñ iñ salqın könne ütkän “Qara çikmän” spektaklendä Mäskäw tamaşaçısı bik küp ide. Şunısı da qızıqlı, 700 dän artıq tamaşaçı arasında spektakl’neñ rusçağa tärcemäsen tıñlıy torğan caylanmanı barı tik 40 keşe genä qullanğan. Dimäk, Mäskäw tamaşaçısı tatarça spektakl’ne añlap qarıy digän süz. Bu xäl säxnä äsäre barışında da belende. Osetinçadan tärcemä itelgän “Qara çikmän” säxnä äsärendä muzıka, cır, iyüllär dä küp. Äsärne säxnägä Färit Bikçäntäev quyğan, muzıkasın Mäsgüdä Şämsetdinova yazğan. Teatrnıñ direktorı Şamil Zakirov ber genä könlek gastrol''läre xaqında söyläp: “Bez Mäskäwdä üz tamaşaçıbız bulğanğa söyenäbez. Alar bezneñ teatrğa tuğrı tamaşaçı. Bu spektakl'' yäşlär öçen quyılğan äsär. Yañaça, zamança eşlängän. Bez ul äsärne Ufada da, Orenburda da, Samarada da, uzğan yıl Mäskäwdä dä kürsätkän idek inde. Kiläse yılğa Mäskäwgä yaña repertuar belän ozağraqqa kilergä uylıybız” – dide ul. Şamil Zakirovnıñ süzenä teatrnıñ rejisserı Färit Bikçäntäev ta quşıldı. «Mäskäwdä, uylanılğança, kübräk rus tamaşaçısı bulır dip faraz itelgän ide. Läkin alarğa ışanıç yuq ikän, yarıy äle üzebeznekelär bar», - dide Färit Bikçäntäev. Ul şulay uq, teatrnıñ repertuarı häm elek yazılğan säxnä äsärlären qaytaru turında de söyläde. Şulay itep, Mäskäwdä üz tamaşaçılarnı tapqan Ğäliäskär Kamal teatrı, ikençe yılğa biregä zur gastrol''lär belän kiläbez dip, Qazanğa ruxlanıp qaytıp kitte .

XS
SM
MD
LG