Accessibility links

пәнҗешәмбе, 8 декабрь 2016, Казан вакыты 17:05

Cheney Bagram nığıtmasında bulğanda intiharçı qapqa töbendä bomba şartlattı


27 Fevral Äfğanstanda çit il ğäskärläre urnaşqan Bagram nığıtmasına intihar höcüm yasaldı. Qorbannar sanı turında qarşılıqlı mäğlümätlär kilä. Ämmä şul bilgele, höcüm waqıtında nığıtmada Quşma Ştatlar vitse-prezidentı Dick Cheney da bulğan. Aña zıyan kilmägän.

Taliban suğışçısı dip şiklänelgän ber intiharçı sişämbe irtäsendä şartlatqıç tutırılğan maşinasın Bagram nığıtması qapqası aldına kiterep şartlatqan. Näq şul waqıtta nığıtmada säfär belän Äfğanstanğa kilgän Quşma Ştatlarnıñ vitse-prezidentı Dick Cheney bulğan dip xäbär itelä. Ämmä aña zıyan kilmägän, berazdan başqala Kabulğa barıp ul Äfğanstan prezidentı Xämit Karzzi belän oçraşqan.

Qorbannar sanı turında törle mäğlümätlär kilä. NATO köçläre süzçese Angela Billing 4 keşe ülgän dip xäbär itte:

"Berençe xäbärlärgä qarağanda bu şartlawda 4 keşe ülgän, şulisäptän, intiharçı üze. Yaqınça 23 keşe yaralanğan, cäräxätlärneñ däräcäse älegä bilgesez" di NATO köçläre wäkile.

Amerikan xärbiläre bu şartlawda ber amerkan soldatı häläk buldı dip xäbär itte. Könyaq Korea da üzeneñ ber härbie ülüe turında belderde. Monna tış qorbannar arasında ber Äfğan xärbie dä bar dielä.

Ul arada Äfğan räsmiläre başqa sannar kiterä. Parwan vilayäte xakime Basır Salangai radiobızğa, şartlaw urınında 20läp cäsad tabıluın äytte:

"İmanım kamil, anda 20läp keşe ülde, 5läbe yaralandı. İntiharçı dip şiklänelgän keşeneñ ğäwdäse dä tabıldı, ul Äfğanlı bulğan dip uylamıla" di Parwan gubernatorı.

Şartlaw kiñ cäyelgän Bagram nığıtmasınıñ iñ berençe tikşerü qapqası aldında bulğan. Cheney tuqtalğan urın, berniçä çaqırım eçtäräk, anda citü öçen tağın 3 tikşerü urının ütärgä kiräk.

Politsiä wäkile Mährän Xan süzlärençä, intiharçı maşinasın qapqağa qädär kiterä alğan:

"Höcümçe qapqanı ütep üzen şartlattı, 18 läp keşene üterde. Säğät 10:15 ide. Min anıñ cäsadın da kürdem, tirä yaqta şartlatqıç qaldıqları ide" di politsiä xezmätkäre.

Amerikan xärbiläre 2001 yılda Bagram nığıtmasın üzläreneñ töplänü urını itkännän birle, bu cir üzenä kürä bazarğa äylängän.

Kön sayın distälägän balaçağa nığıtma qapqası aldında xärbilärdän, jurnalistlardan yä isä çiratqa basqan maşina yörtüçelärdän xäyer soraşa.

Ülüçelär arasında küp tınıç keşe buluın Parwan gubernatorı näq menä şunıñ belän añlattı:

"Ul näq qapqa aldında bulğan, yänäşädä genä keşelär basıp toğan, şuña kürä ülüçelär, yaralanuçılar küp" di Parwan xakime.

Könbatış möğlümät çaraları bu höcüm öçen cawaplılıqnı üz östenä Taliban xäräkäte alğan dip xäbär itte. Taliban süzçese dip sanalğan Xayat Xan mulla süzlärençä, intiharçı Dick Cheneynıñ nığıtmada bulğanın belgän häm näq anı xädäf itmäkeç bulğan.

Ali Ğilmi
XS
SM
MD
LG