Accessibility links

якшәмбе, 4 декабрь 2016, Казан вакыты 23:29

Tatar başın kem aşıy?


Fevral'neñ 21-ye tarixi data bulıp tora. Bez här yılnı bu datanı üzençä bizäp tatar teleneñ kiläçäge turında ğına söyläşep uzmıybız, tatar tele saqlansın öçen ni ğämäl qılu turında da küp süz bula. Här keşe tatar telen saqlaw yözennän nider başqara. Läkin dä bıyılğı 21-nçe fevral' ikelätä xäsrät tä kiterde. Bu könne Federatsiä Şurası şartnamäne raslamadı, şuşı könnärdä ük “Yaña ğasır” dulqınında “Azatlıq” radiosı üzeneñ tapşıruların tuqtataçaq digän şomlı xäbär taraldı. Şuşı tönne ük Samar milli xäräkäte yulbaşçıları üzara fiker alışularnı oyıştırdı, häm şul uñay belän “Tuğan tel” isemle Samara ölkä tatar cämğiäte häm Samar şähäreneñ tatar milli- mädäni möxtäriäte citäkçeläre Tatarstan İlbaşı Mintimer Şäymievkä, Bötendönya tatar kongressı Başqarma komitetı räise Rinat Zakirovqa, zur säyäsätçelärebez Rafael' Xäkimov, İndus Tahirov, fändäs Säfiullin, Razil Välievlärgä möräcäğätnamä yulladılar. Möräcäğätnamäneñ qısqaça eçtälege tübändäge fikerlärdän ğıybärät:

“Yaña ğasır” radiodulkınında “Azatlıq” tapşıruların tuqtatu küñellärebezgä äytep betermäslek näfrät toyğıların uyatıp cibärde. Millät- millät dibez, tel- tel dibez. Menä şul zur burıçnı – tatar milläten berböten itep intellektual' bieklekkä kütärep, tatarpärwarlıqnı tärbiäläwdä özleksez eş alıp baruçı “Azatlıq”nı üzebezneñ ük tatar türäläre dulqınnan quıp çığaralar. Tatar başın tatar aşıy bulıp çığa bit!

Tatarstan İlbaşı Mintimer Şäymiev çit töbäklärdä, çit mämläkätlärdä yäşäwçe tatarlarğa efir aşa tuğan telebezne öyränü mömkinlegen tudırdı. Aña çiksez räxmätebez. “Yaña ğasır” radiodulkınınnan “Azatlıq” tapşıruların quıp çığaralar. Hiçşiksez, Bötendönya tatar kongressı üzeneñ çirattan tış Başqarma komitetın cıyıp bu mäsäläne uñay xäl itü yulın tabar dip ışanabız. Bügenge köndä “Azatlıq” tapşıruları tatar dönyasınıñ informatsion radio bieklegenä kütärelgän däräcäle radio. “Yaña ğasır” dulqınında “Azatlıq” tapşıruların tıyu – ul rossiädä salqın suğış çorına qaytu digän süz, demokratiäneñ soñğı şäwläsen dä yuqqa çığaru, tatar tıñlawçısınıñ xoquqın kisü. “Azatlıq” radiosınıñ tapşıruların tuqtatu – ul tatarlarnıñ mäğlumat alu ofığın yuqqa çığaru.

Läkin dä bezneñ sorawlarıbız da bar. “Yaña ğasır” radiodulkınında “Azatlıq”nı qaldırır öçen “Yaña ğasır” teleradiokompaniäneñ general' direktorı ilşat Aminov nindi çaralar kürä? Kemgä yärdäm sorap barğan?

Rossiä külämendä tolerantnost' turında küp söylänä. ä konkret eşkä kilgändä ğämällär tolerantnost'qa qarşı kilä. Deputatlar Tatarstan – Rossiä şartnamäsen köçkä qabul ittelär. Federatsiä Şurasında şartnamäne tanımadılar.

Çit töbäklärdä tatar mäktäpläre yuq, balalar baqçaları yuq. Tatar awıllarındağı mäktäplärdä dä tatar telen qısıp çığarıp beterälär.

Bez “Yaña ğasır” radio häm tele tapşıruların tıñlar öçen xalıq arasında bik zur añlatu eşen alıp barabız. Xalıqnıñ küpçelege xäzer üz aqçalarına ğäläm kiñlegennän “Yaña ğasır”nı tıñlar häm qarar öçen tälinkälär quyalar. Häm bu eşne alar “Azatlıq” tapşıruların tıñlar öçen dä eşlilär. Bügenge köndä sibelgän tatarnı ber ğailä itep totuçı – ul “Azatlıq” dulqını ğına.

Tatarstan citäkçeläre, tatar zıyalıları bezneñ üteneçebezne kütärep alırlar häm “Azatlıq” “Yaña ğasır” dulqınınnan töşep qalmas digän ömettä qalabız.

Rossiä Yevrosoyuzğa kerü turında süz alıp bara, ä azçılıq millätlärneñ telen saqlaw yözennän tege yäki bu ildä çit mämläkättän radiotapşırularnı translyatsiälänüne dä küzdä tota Yevropa Xartiäse”,- dielä Samar tatar milli xäräkäte liderları möräcäğätlämäsendä.

Şamil Bahautdin, Samar

XS
SM
MD
LG