Accessibility links

якшәмбе, 11 декабрь 2016, Казан вакыты 03:22

Azatlıq awazı Yaña Ğasırdan kitä


Bügen fivralneñ 28-se, ä irtägädän başlap Tatarstandağı Yaña Ğasır radiosı Azatlıqnıñ ber säğätlek programmasın birüne tuqtata. Soñğı söyläşülär näticäsendä Azatlıqnıñ Yaña ğasırda älegä 20 minutlıq ber yañalıqlar blogı belän qaluı xaqında kileşende, ä inde asıl programmanı tıñlawçılarıbız "salqın suğış" yıllarındağı kebek qısqa dulqınnarda işetä alaçaq.

Beläsezme, min üzem Azatlıqnı qısqa dulqınnarda tıñlap üskän keşe. Tıñlarğa mömkinlek bulğanda, älbättä -- ul zamanda Könbatıştan kilgän awazlarnı tomalaw ğädäte bar ide. Küplär xäterlider, äle Azatlıq tapşıruları başlanunı kötep tä tormıy, alar efirğa çığası yışlıqlarda 4-5 minut aldan uq döberdäw, sawlaw, reaktiv oçqıç tawışları kilä başlıy ide.

Xäzer küplär sükkän Gorbaçovnıñ üzgärtep qoruı Azatlıqnı da şul kilbätsez qılanulardan azat itkän ide. Ä inde 1998-nçe yılda Azatlıqnıñ töp ber säğätlek tapşıruları ğomumän Tatarstan radiosı, soñraq Yaña Ğasır dulqınında yañğırıy başladı. İrtägän alıp bu tuqtatıla.

İñ ayanıçı şul - Yaña Ğasır citäkçelege üze Azatlıqnıñ Yaña Ğasır dulqınınnan kitüen hiç telämi. "Bez mäcbürbez, Mäskäwdäge federal xakimiät bezgä basım yasıy", di alar. Süz dä yuq, Rusiädä xäzer xällär başqa, üz eçke eşlären üze xäl itä başlağan tatardan bu xoquqın äkrenläp kire ala baralar, häm bu yaqtan qarağanda, Yaña Ğasır citäkçelären bez yaxşı añlıybız. Mäğlümät taratu eşen Mäskäw üz qulında nıq tota, kiläse yılğa bilgelängän prezident saylawları aldınnan ul tağın da nığıyaçaq, dip kötärgä bula.

Ä inde Yaña Ğasır belän Azatlıqnıñ araları yaxşı buldı häm yaxşı bulıp qalır dip ömetlänäbez. Alarnıñ üz täqdime belän xäzer Yaña Ğasırda Azatlıqnıñ keçeräk ber közgese çığa başlayaçaq. Ul 20 minut däwam itäçäk, häm anda Azatlıqnıñ töp programmasında yañğırağan ayırım xäbärlär keräçäk. Azatlıqnıñ Tatarstanda şaqtıy ğına tıñlawçısı buluın bez beläbez, monı yıl da ütkärelä torğan sotsiologik tikşerenülär dä yaxşı kürsätä. Şuña da bez Yaña Ğasır täqdimen qabul itäbez. Şundıy urtaq qaraşka kilügä Azatlıqnıñ Tatarstandağı tıñlawçıları da bulıştı diärgä bula, alarnıñ qayberläre Azatlıqnı yaqlap xätta Miñtimer Şäymievkä dä xat yullağan.

Ämma berük waqıtta 20 minutnıñ ber säğätlek tulı programmanı alıştıra almawı da kön kebek açıq. Azatlıq Qazan yä Tatarstan yañalıqların ğına söylämi bit, anda dönya xäbärlären dä, tatar-başqortlar yäşägän töbäklärneñ xäl-äxwäle turında da işetep bula. Alarnıñ barısın da 20 minutqa sıydıru mömkin tügel. Şuña da asıl Azatlıq, çın Azatlıq qısqa dulqınnarda bulaçaq. Häm İnternetta.

İnternet digäne bik caylı ber närsä ul, xörmätle tıñlawçılar. İrenmiçä kerep qarağız äle sez Azatlıqnıñ internet säxifäsenä - anda tapşırunı teläsä qayçan tıñlap bula. Sezgä bu eştä balalarığız, onıqlarığız yardäm itä ala - ber uñaydan, alar da tere, saf tatar telen işeter sezneñ belän bergä.

Qısqası, bezne FM dulqınınnan ayırsalar da, telägän keşegä, irekle mäğlümätkä susağan keşegä, Azatlıqnı yaqın itkän tıñlawçılarıbızğa başqa mömkinleklär qala. Häm biredä bit süz Azatlıqnı yaratu-yaratmaw turında da tügel. Süz irekle, başqa törleräk mäğlümätkä ixtiac bulu turında. Ä ul ixtiac bar, Azatlıq Tatarstandağı başqa radiolar birmägän mäğlümätne birä. Monı bezne söymägännär dä tanıy, häm iñ qızığı, alar da tapşırularnı tıñlıy.

Süz azağında Azatlıqnıñ Tatarstandağı bar tıñlawçısın da isemläp sälämläp çığarğa telär idem, ämma bu hiç mömkin tügel, moña bezgä täqdim itelgän 20 minut qına tügel, bügenge ber säğät tä citmäs ide. Şuña da Azatlıqnıñ bar tıñlawçıları wäkile itep respublikanıñ törle töbäklärendä yäşägän, bezne kön sayın tıñlap barğan berniçä canatarıbıznı sälämläp tämamlar idem. Qabatlap äytäm - alar isemnären atap beterep bulmağan bar tıñlawçılarnı gäwdäländerä - Älmättäge Qarabaş awılında äle genä 77 yäşen tutırğan Şärip ağa Fäsxetdinov, Arçadağı Qazanbaş awılınnan Saniä apa, Baltaçnıñ Borbaş awılınnan Zäynäxetdin abıy, Aznaqaydan İğlimä Şäydullina, Qazannan Älmirä Ädiätullina - Azatlıq sezneñ belän xuşlaşmıy, dönyalar rätlängänçe sawbullaşıp qına tora.

Kärim Kamal

XS
SM
MD
LG